Ni Joy F. Tumulak
Thursday, December 1, 2011
NAMATAY ang usa ka 9-anyos nga batang lalake dihang girapido sa ilang silingan niadtong Miyerkules sa gabii ang ilang balay samtang sila nangatulog.
Nangaangol usab ang iyang mga ginikanan, apan luwas ang iyang duha ka mga manghod sa krimen nga ang hinungdan mao ang usa ka iro.
Biktimang namatay giila sa kapulisan nga si Jasper Ceniza, kinsa naigo sa kuto-kuto sa bala sa kalibre .45 nga pistola nga gigamit sa suspek nga si Junrey Andrecoso, 38.
Mga biktima ug suspek pulos taga sityo Kabulihan, Barangay Guba, bukiran nga barangay nga sakop sa siyudad sa Sugbo.
Samtang ang nasamdan mao ang iyang mga ginikanan nga sila si Cristina Ceniza, 27, mabdos og pito ka buwan, kinsa naigo sa wa nga tiil ug iyang Reynaldo Ybañez, 38, naigo sa tuo nga paa.
Sa pasiuna nga imbestigasyon gihimo ni PO3 Geofrey Gutual ug mga kaubanan sa Homicide Section sa Cebu City Police Office (CCPO) nagbutyag nga nangatulog na ang mga biktima sa ilang balay.
Kalit lang niabot ang suspek atubangan sa ilang balay ug dayong pamusil kanila sa makadaghan nga mga higayon gamit ang pistola.
Si Reynaldo, bisan kon samaran, nakahigayon pa sa pagkamang paingon sa gawas sa ilang balay.
Maoy iyang nakita ang suspek nga daling midagan palayo sa lugar human namusil.
Ang ilang duha ka laing mga anak nga nag-edad og tres ug singko anyos wa maigo sa pagpamusil.
Pag-responde sa mga sakop sa Homicide Section, gisultihan sila ni Ybañez kinsa ang namusil kanila.
Nilusad gilayon og hot pursuit operation ang kapulisan base sa gisulti ni Ybañez.
Ilang nasikop ang suspek, kinsa sa sinugdan nanghimakak sa iyang kalambigitan.
Apan dihang iyang nahibaw-an nga si Jasper namatay, diha na siya niangkon.
Iyang giklaro nga wa siyay itensyon nga ilakip ang bata apan uwahi na ang iyang pagbasol.
Atol sa pasiuna nga imbestigasyon nasuta sa kapolisan nga nasuko ang suspek ngadto sa magtiayon, human sila magka-away tungod lang sa iro.
Ang iro ni Andrecoso nakapaak kang Jasper niadtong Nobiyembre 27 hinungdan nga nihangyo si Ybañez nga higtan kini.
Apan ang suspek wa mosugot hinungdan nga nibahad si Ybañez nga kon iyang makit-an ang iro, iya gyud kining taguron.
Tungod sa maong hulga, gikasuko kini sa suspek.
Matod sa mga imbestigador nga ilang nasayran gikan sa mga lumolupyo sa sityo Kabulihan nga si Andrecoso nag-inom sa duol nga tindahan mga alas 7 sa gabii niadtong Miyerkules.
Si Belen, asawa ni Andrecoso, nisulti sa mga pulis nga ang iyang bana nipauli mga alas 8:30 sa gabii apan paglabay sa pipila ka mga minuto nibiya.
Pagkataudtaud nakadungog na lang siya og mga buto sa pusil.
“Wala intawn miy sala, nganung gipamusil man mi?†matod ni Cristina sa interbyu sa TV Patrol Cebu.
Ang payag sa mga Ybañez nahimutang mga pipila ka metros gikan sa balay sa mga Andrecoso.
Si Yolito Mabini, kabanay ug silingan ni Ybañez, niingon nga sila si Reynaldo ug Andrecoso nagkalalis niadtong Lunes human paaka sa iro sa suspek si Jasper.
Giangkon ni Andrecoso nga nasuko siya dihang nihulga si Reynaldo nga ihawon ang iyang iro.
“Molaban gyud ko sa akong iro. Wa nako to tuyoa, pero naglagot lang jud ko pag-ayo atong gutloa,†sulti ni Andrecoso sa Sun.Star Cebu.
Gitugyan ni Belen kagahapon ang kalibre .45 nga pistola. Upat ka mga kabhang ang na-recover sa crime scene. Kasong murder ug frustrated murder ang ipasaka batok sa suspek nga nabilanggo na sa CCPO detention cell. (dugang taho sa SSC) --
Gipatik sa mantalaang SuperBalita Cebu Desiembre 02, 2011. Linkback:
https://tubagbohol.mikeligalig.com/index.php?topic=44520.0
