Ni Jojo C. Ugdol/EIM (Banat) | Updated June 25, 2015 - 12:00am
CEBU, Philippines - Usa ka kalabira sa gituohang iya sa usa ka babaye ang napalgan sa kalasangan sa Sitio Cagay, Barangay Poblacion lungsod sa Alcoy sa nakalabay nga hapon.
Si Police Officer 3 Andy Gornez sakop sa Alcoy Police kinsa apil sa niresponde sa lugar nga nahinabi sa Banat News nagkanayon niadto pa’ng petsa 17 nakit-an sa usa ka mag-uuma ang maong kalabira.
Apan wala kini dayon gitug-an sa kapulisan sa pagtoo nga usa kini ka patay nga unggoy. Apan human nasayod ang ubang mga tawo nga dunay patay nga unggoy duna na sa’y ubang residente ang misubay sa lugar hangtod nga ilang nadiskubrehan nga kini kalabira sa usa ka tawo.
Sumala pa ni Gornez nga kompleto pa ang bukog apan ang mga gagmay niini nga bahin sa lawas nangawala na nga posibleng gipangkaon na sa hayop. Sigun pa sa municipal medical officer sa maong lungsod nga usa ka babaye ang kalabera, ug gibanabanang anaa sa 20 hangtod 30 ang pangidaron ug mga lima ka tiil ang gitas-on.
Gitug-an sab ni Gornez nga ang municipal officer miingon adunay liki ang ulo sa kalabira apan dili pa makatumbok ang kapulisan kung kini inagian sa pagbunal o kun gipatay o naaksidente lang kini sa dapit ug nabunal ang ulo. Apan posible gyud usab matud pa ni Gornez nga gipatay ang biktima diha sa lugar tungod sa kamingaw ug kalibonan ang lugar.
“Ug dalhon ka didto aron patyon di gyud ka madunggan bisan og mosinggit pa kay pwerteng mingawa, lasang na siya nga lugar,†matud pa ni Gornez.
Si Gornez nagtoo nga posibleng dili taga ilaha ang maong babaye kay wala man sa’y na-blotter sa ilang buhatan nga “missing person.â€
Nanawagan ang kapulisan sa publiko ilabi na sa mga nawad-an og sakop sa pamilya nga usa ka babaye nga makig-alayon lang sa ilang buhatan aron pag-ila sa maong kalabira. (BANAT NEWS)
Linkback:
https://tubagbohol.mikeligalig.com/index.php?topic=80270.0