Ni Dennes R. Tabar
Friday, July 15, 2011
REGISTERED nurse naghikog pinaagi sa pagpusil sa iyang ulo sulod sa opisina sa iyang uyab nga usa ka company nurse pasado ala 1 kagahapon sa hapon Brgy. Alang-Alang, dakbayan sa Mandaue.
Ang namatay giila nga si Michael Ryan Devera, 25, ulitawo, taga Barangay Tingub sa maong siyudad, usa usab ka registered nurse.
Base sa inbestigasyon sa kapulisan, ang namatay niadto sa opisina sa iyang uyab nga usa usab ka nurse sanglit mao man kini ang company nurse sa Huayu Construction.
Sigun sa asoy sa iyang hinigugma nga didto kini sa sulod nagdala nag armas ug sige og tion sa iyang ulo tungod kay maghikog.
Ang duha upat na ka tuig nga nagkauyab apan karong bag-o nagkaaway-away na ug di na ganahan magkig-estorya ang babaye.
Si Chief Insp. Elmer Fernandez, pangulo sa Station 1 diin nasakop ang Brgy. Alang-Alang, niingon nga nigawas ang babaye sa pikas kuwarto tungod kay di man mopatuo ang iyang uyab nga di ition ang armas sa iyang ulo.
Sa dihang nigawas, nadungog na lang sa ubang mga kawani ang kusog nga boto sa armas ug maoy ilang nakita nga naigo na sa walang bahin sa ulo.
Si Devera daling gidala sa Perpetual Succour Hospital, apan gideklarar sa mga mananambal nga patay nang midangat sa tambalanan.
Ang imbestigador sa homicide section nga si SPO4 Marcos Noval nibutyag nga wa pa gayod nila makuha ang kompletong detalye kon unsay giawayan sa duha sanglit di pa man nila mahinabi ang uyab niini nga nakalitan sa hitabo.
Apan ilang plano nga ipailawom kini sa paraffin test aron mawala ang pagduda nga adunay foul play ang hitabo.
Hinuon ang uyab ni Devera nipahibawo nga andam usab siyang mopailawom sa paraffin test.
Ang kapulisan nakakuha usab og saksi nga duha ka mga engineer nga kauban sa babaye nga nakakita sa hitabo nga nigawas na ang iyang uyab sa kuwarto una pa nadungog ang buto sa armas.
Gipatik sa mantalaang SuperBalita Cebu Hulyo 16, 2011.Linkback:
https://tubagbohol.mikeligalig.com/index.php?topic=42261.0