Napalgang hubo, gahi ang kinatawo; pulis moimbestigar
Monday, August 30, 2010
Ni Guam P. Logroño
HUBO nga patay nga lawas sa usa ka ulitawong tiguwang napalgan kagahapon sa buntag sud sa iyang balay sa Brgy. Obaob, lungsod sa Argao, Sugbo.
Nahibung ang mga imbestigador kay nagbarog pa ang iyang kinatawo dihang ilang nakaplagan hinungdan nga ilang susihon kon wa ba kiniy foulplay.
Si Prudencio Catalan, 60, ulitawo, usa ka scavenger og scrap metal, nakit-an sa iyang silingan nga nagbuy-od nga wa nay sapot samtang nagbuwa ang baba ingon man ilong.
Si PO2 Benjamin Herozaga, desk officer sa kapulisan sa lungsod nga nahinabi sa Sun.Star Superbalita, nagkanayon nga ang silingan sa namatay maoy nakakita niini didto sa sulod sa payag-payag niini nga patay na.
Matod niya nga ang silingan niadto unta sa balay niini aron mangayog sigarilyo nga ginama sa dahon sa lomboy apan sa paglantaw niini maoy iyang nakit-an nga nagbuy-od si Catalan nga naghubo ug nagbuwa-ang baba ug ilong ug nagbarog pa ang kinatawo niini.
Daling gitawag ang mga kabanay niini ug gi-report sa kapulisan.
“Pag-abot sa akong mga kauban sila si SPO1 Arnold Abenir, nakit-an nila ang patayng lawas ni Catalan nga nagbuy-ob pero nahibulong sila kay gawas nga nagbuwa ang baba, ilong, nagbarog pa man ang kinatawo, “ sumala pa ni PO2 Herozaga.
Samtang gisugyot nila ngadto sa kabanay nga ipaubos sa autopsy ang lawas ni Catalan, aron masuta kon wala bay foulplay ang kamatayon niini.
Hinuon, way nakit-an ang kapulisan nga dunay samad ingon man lagom ang lawas niini.
Wa hinuon nila isalikway ang posibilad nga giatake kini sa kasingkasing o kaha adunay gikaubang babaye sa wa pa mamatay samtang posible usab nga niinom kini og tambal nga pangpalagsik sa lawas sa kama.
Giklaro niya nga ang ka live-in sa namatay nipauli sa Brgy. Langtad, sa nahisgutang lungsod human usab ang duha nagkaaway.
Apan niatong miaging adlaw giingong pwerting huboga ni Catalan nga nakit-an pa sa iyang mga silingan.
Dugang ni Herozaga nga bisan tuod kon sa ilang imbestigasyon nasuta nga way kontra ang namatay wa usab nila isalikway ang posibilidad nga gihiloan si Catalan.
Apan alang kanila aron mahanaw ang pagduda angay ipa-autopsy ang lawas niini.
Gipatik sa mantalaang Sun.Star Superbalita Cebu sa Agosto 31, 2010.Linkback:
https://tubagbohol.mikeligalig.com/index.php?topic=31639.0
