NAPUSILAN matud pa sa lubot ang usa ka lalaki nga nangawat sa balay sa inahan ni boxing idol ug Sarangani Rep. Manny Pacquiao sa barangay Labangal ning dakbayan, Huwebes.
Ang napusilan ug kauban niining nasikop ang puros usab kabanay ni Mommy Dionesia.
Giila ang duha nga silang Ranil Bendoy, 19-anyos, ulitawo ug Richard Chato, hamtong ang pangidaron nga pulos residente sa Purok Acharon, barangay Labangal.
Matud ni Police Inspector Romulo Villarta, officer in charge sa Makar Police Station, nga sayo sa buntag nasapon sa akto ni Sarhento Jerson Estopona, driver-bodyguard ni Mommy Dionesia, silang Bendoy ug Chato sulod sa balay nga adunay gikuhang butang.
Si Chato ang misulay sa pagkatkat sa pader aron moikyas apan napusilan sa maong bodyguard.
Samtang, nadakpan usab si Bendoy nga nabalhog na sa selda sa Makar Police Station. Si Chato nagpabilin pa sa General Santos City Hospital.
Nangayo og pasaylo si Bendoy sa pamilyang Pacquiao bisan pa man andam kini nga atubangon ang ipasakang kaso batok kaniya.
Sa imbestigasyon sa kapulisan, nabawi gikan kang Bendoy ug Chato ang mga gripo, circuit breakers ug fire extinguisher.
Nasayran nga ang gikawatan nga mansiyon ang ga-ibaligya ni Mommy Dionesia human kini nagpatukod og bag-ong balay sa may barangay San Isidro, ning dakbayan. (Merry Grace Cortez)
Linkback:
https://tubagbohol.mikeligalig.com/index.php?topic=78759.0
