Saturday, August 6, 2011
USA ka asset sa Philippine Drug Enforcement Agency (PDEA) ang gipusil patay sa alas 7:00 sa gabii niadtong Biyernes didto sa probinsiya sa Sultan Kudarat.
Nailhan sa kapulisan ang biktima nga mao si Michael Aranas, 44, minyo ug molupyo sa Barangay Bual, President Quirino sa maong probinsiya.
Base sa imbestigasyon gikan sa Sultan Kudarat Police Provincial Office, nasayran nga si Aranas nagtindog lang atbang sa iyang tindahan sa maong dapit sa dihang giduol sa duha ka wala mailhing suspek ug dayon pusil kaniya.
On the spot nga namatay si Aranas human nga maigo ang iyang likod nga bahin ug milapos sa iyang dughan. Samtang samaran sab ang pag-umangkon ni Aranas nga si Armando human nga maigo sa saag nga bala.
Mga suspek daling misibat sa crime scene ug misakay og DT Yamaha nga motorsiklo nga walay plaka paingon sa hilit nga dapit sa siyudad sa Tacurong.
Gisapupo gilayon si Armando kinsa naigo sa iyang paa ug gidala sa Tamondong Hospital sa Tacurong kon diin luwas na sa makuyaw nga kahimtang.
Gikanayon ni Armando nga wala siyay nailhan sa mga suspek gumikan kay pulos sila nagsul-ob og helmet.
Dako ang pagtuo sa kapulisan nga ang nahitabo sa biktima dunay kalabutan sa iyang trabaho isip asset sa PDEA ug padayon pa silang mihimo og dugang imbestigasyon. (EF)
Gipatik sa mantalaang SuperBalita Davao Agosto 07, 2011.Linkback:
https://tubagbohol.mikeligalig.com/index.php?topic=42768.0
