Ni Jojo C. Ugdol/GMR (Banat) | Updated August 6, 2015 - 12:00am
CEBU, Philippines - Patay na nga nakit-an ang usa ka lalaki nga naanod sa kalit nga daku’ng baha nga nibanlas sa suba sa Combado, Balamban pasado alas 6 sa nakalabay nga sayo sa buntag.
Giila ang namatay nga si Gerry Caburnay, hingkod ug nagpuyo sa mao’ng dapit.
Matud ni Police Officer 1 Alexander Camoro, desk officer sa Balamban Police Station, nga kauban sa biktima ang duha ka silingan nga namukot daplin sa suba.
Pipila ka minutos usa ka daku’ng bul-og sa tubig gikan sa bukid ang kalit nibanlas sa suba ug ang biktima ang suway pa unta nga nipadaplin apan naanod.
Ang mga kauban ang suway pa unta nga niluwas sa biktima apan wala na’y nahimo gumikan sa kakusog sa tubig baha.
Kagahapon sa buntag nakit-an ang patay’ng lawas sa biktima nga nadagsa sa baybayon sa Baliwagan sa mao’ng lungsod.
Sigun pa ni Camoro nga ang suba mao’y pinakadaku sa ila’ng lungsod diin kasagaran mamukot ug mamasol ang mga tawo.
Ang kapolisan nitambag sa publiko nga magbantay sa suba ilabi na kung dunay daku’ng uwan sa bukid nga lagmit moresulta sa kalit nga baha. (BANAT NEWS)
Linkback:
https://tubagbohol.mikeligalig.com/index.php?topic=80708.0
