Ni GUAM P. LOGROÑO
NAANGOL ang bakol human gitigbas sa hubog dihang nasaghiran sa iyang wheelchair ang ilimnon ug nayabo niadtong Sabado sa alas 6:05 sa gabii sa Barangay San Rafael, lungsod sa Barili.
Si Noven Clarin, 24, ulitawo, taga Barangay San Jose, lungsod sa Borbon, nakaangkon og daghang samad tinigbasan sa lawas, samtang nadakpan si Placido Cañete, 53, minyo ug nagpuyo sa dapit.
Si PO2 Joetemar Tejano, desk officer sa Barili Police Station nga nahinabi sa Sun.Star Superbalita, nagkanayon nga ang biktima naabot sa dapit.
Ang suspek uban sa iyang mga silingan nag-inom samtang miagi si Clarin nga nagsakay sa iyang wheelchair apan nasaghiran niya ang ilimnom hinungdan sa pagkayabo niini sa yuta.
Niresulta nga nagkalalis sila sa biktima tungod sa kalagot sa suspek nipauli kini ug nagkuhag sundang ug gitigbas ang biktima sa makadaghang higayon.
Si Clarin nakapangayog abag kang PO2 Dan Villardar hinungdan nga nadakpan si Cañete ug nakuha ang sundang nga 24 pulgadas ang gitas-on.
Ang biktima nadali sa pagdala sa tambalanan sa dakbayan sa Sugbo ug tukmang kaso ipasaka sa kapulisan batok sa suspek karong adlawa.
Gipatik sa mantalaang SuperBalita Cebu Oktubre 19, 2015.
Linkback:
https://tubagbohol.mikeligalig.com/index.php?topic=81192.0
