Ni Darrel Carumba (Banat) Updated June 08, 2011 12:00 AM
CEBU, Philippines - Namatay ang angkas sa motorsiklo ug kritikal ang drayber niini human sila dasmagi sa usa ka “killer bus†didto sa eskina Sta. Cruz, barangay Curva, sa lungsod sa Medillen niadtong Lunes sa alas 3:00 sa hapon.
Ang namatay paghidangat sa tambalanan mao si Joelito Opura, 18, nga taga barangay Caputatan Sur sa maong lungsod.
Samtang ang drayber sa motorsiklo nga si Bernard Esconia, 20, silingan ni Opura kritikal ang kahimtang.
Sa laing bahin ang drayber sa Rough Rider ang giingong killer bus nga adunay plaka nga GVY-254 mao si Rafael Matugas Almendras, 58 , minyo, nga taga Sitio Kamalig Bato, barangay Taboc siyudad sa Danao.
Si PO1 Louie Misa sa Medillen Police Station mibutyag sa Banat News nga ang motorsiklo nga gisakyan sa mga biktima maoy nag-una ug nagsunod ang Rough Rider paingon sa amihanang bahin sa Medillen dihang sa pag-abot sa eskina Sta. Cruz kalit nga miliko sa wala ang motorsiklo.
Gumikan sa kakalit, na-apiki na pag-apply sa preno ang drayber sa bus hinungdan nga gidaro niini ang motorsiklo ug ang angkas nga si Opura natagak sa karsada ug nalatayan sa mga ligid sa bus ug naguyod kini hinungdan nga nalata ang iyang lawas.
Samtang si Esconia nalagpot sa daplin sa karsada ug wala na maligsi sa mga ligid sa killer bus.
Daling gihatod ang mga biktima ngadto sa Verallo District Hospital sa siyudad sa Bogo diin si Opura didto ideklarar nga patay na , samtang si Esconia gibalhin usab dayon sa tambalanan sa dakbayan sa Sugbo. (WC)(BANAT NEWS)
Linkback:
https://tubagbohol.mikeligalig.com/index.php?topic=41436.0
