DAVAO DEL NORTE -- Nakaangkon og samad dinunggaban ang usa ka lalaki sa dihang gitulis samtang nagpaabot unta sa gikasabot niyang ika-eyeball nga textmate nga babaye.
Padayon pang gitambalan sa ospital kagahapon sa buntag ang biktima nga si Jay Michael Caday, 23, processor sa LYR Marketing ug molupyo sa Purok 4, La Filipina sa dakbayan sa Tagum.
Nasayran nga alas 9:30 sa gabii niadtong Lunes dihang mituyo si Caday og adto sa New City Hall, Apokon sa dakbayan aron makig-eyeball sa ka-textmate nga giilang si Jane.
Malipayon ang biktima nga miadto sa lugar nga ilang gikasabutan. Apan labihan na lang niyang kuganga nga imbis si Jane ang iyang ikahinagbo, usa man hinuon ka lalaki nga dunay dalang kutsilyo ang miabot dayong giliaban siya ug gitionan sa kutsilyo ang liog ug gitulis.
Sa inisyal nga imbestigasyon sa kapulisan sa Tagum City Police Station, nasuta nga misukol ang biktima sa suspetsado ug nakig-inilugay sa kutsilyo, hinungdan nga nadunggaban ang nawong niini.
Nakuha gikan kaniya ang iyang selpon nga ARC mobile phone nga nagkantidad og P3,000.
Gawas sa samad sa nawong, duna say samad ang palad sa biktima.
Nakita na lang ang biktima sa nag-roving nga guwardiya sa maong dapit nga nagkadugo na ug gidala sa balay tambalanan.
Samtang ang suspek daling mi-eskapo sa wala masayring dapit.
Gisubay na sa kapulisan ang maong hitabo aron nga mailhan ang suspetsado ug madakpan. (DRP)
Gipatik sa mantalaang Superbalita Davao Pebrero 24, 2016.
Linkback:
https://tubagbohol.mikeligalig.com/index.php?topic=81915.0
