Thursday, May 5, 2011
GILUBA sa 19 anyos ang iyang kaugalingon human giingong nakawala og cellphone sa iyang ig-agaw niadtong Miyerkules mga alas 7:00 sa gabii sa lungsod sa Initao, Misamis Oriental.
Giila ang biktima nga mao si Shiela Villanosa, dalaga, residente sa susamang dapit.
Ang uyoan niini nga maoy nakakita sa biktima nga gipasakitan ang kaugalingon niini niingon nga unang nanghulam og cellphone ang biktima sa ig-agaw niini, apan dihang nawala, posibleng nahadlok ang biktima kung unsay irason labina wala man gituyo niini.
Nakita kining mikuha og kutsilyo dayon giluba ang iyang paa nga mitaroy pa dihang daling gidala sa Northern Mindanao Medical Center (NMMC) ning siyudad sa Cagayan de Oro.
Gitouhan sa uyoan nga posibleng nahadlok kini nga makasab-an niadtong tungora mao nga gusto na lamang niining hunoson ang kaugalingon.
Samtang miguwa usab ang taho nga gibulagan ang biktima sa uyab niini hinungdan nga gustong maghikog.
Ubos pa sa oberbasyon, ang biktima ning panahona sulod sa emergency room human wala pay panimout sa pagsulat ning balita. (Stephanie V. Berganio)
Gipatik sa mantalaang SuperBalita Cagayan de Oro Mayo 06, 2011. Linkback:
https://tubagbohol.mikeligalig.com/index.php?topic=40549.0
