Friday, February 22, 2013
USA ka engineer ang midangop sa kapulisan aron ireklamo ang usa ka commercial sex worker ug laing usa ka higala niini gumikan kay wala siya gilipay ibabaw sa kama.
Ang maong engineer gitago sa pangalan nga Romeo, 58, biyudo, negusyante, residente sa Kilometro 17, Amparo Village, Barangay Ilang, siyudad sa Davao.
Gireklamo mao ang commercial sex worker nga gitago sab sa pangalan nga Russel, hamtong, residente sa Barangay Wilfredo Aquino, Agdao District, ning siyudad.
Gisaysay ni Police Officer 2 (PO2) Edgar Lañohan, desk officer sa Sta. Ana Police Station, mireklamo ang maong engineer sanglit kay wala siya gilipay sa sex worker.
Nasayran nga niadtong Pebrero 15, 2013 nagkaila ang duruha pinaagi ni alyas Che Che, hamtong, residente sa Kawayan Drive, Barangay Matina Crossing nga higala ni Russel.
Nagkahigalaay sila Romeo, Russel ug Che-che kinsa nagustuhan sa engineer.
Giingon nga nangadto sila sa dakong Mall sa Ecoland diin nangaon ang tulo, dayon gipalitan ug mahalon nga tsinelas si Che-che nga nagkantidad ug P1,550.
Gihatagan pa siya sa engineer ug P3,500 bugti sa serbisyong sekswal ngadto kang Che-che.
Giingnan ang biktima ni Che-che nga pagka-ugma nalang sila maglingaw-lingaw ibabaw sa kama.
Tungod kay misalig siya, gibilin pa sa engineer ang iyang cellphone kang Russel aron duna silay kontak.
Kagahapon sa buntag, nasayran sa engineer nga dili mosugot si Che-che sa ilang kasabutang tungod kay tiguwang na ang enhenyero.
Tungod sa nahitabo, nasuko ang engineer dayon buot niyang kuhaon ang gibilin nga cellphone, apan dili kini ihatag ni Russel kung di siya bayaran ug P3,750.
Ang maong hitabo gireport sa pulis ug imbes bayaran si Russel sa kantidad nga iyang gipangayo, giposasan hinuon siya sa kapulisan. Si Che-che wala na sab nakita hangtud kagahapon.
"Pakyas sa tibuok nakong kinabuhi. Karon ra unta ko naka-inom og pampatindog, wala pa gyud nahinayon," sulti sa engineer sa Sun.Star SuperBalita.
Gibalhog karon si Russel sa detention cell sa presinto uno samtang ang engineer nagpaabot nga mabalik kaniya ang iyang nagasto lakip na ang cellphone. (Jeepy P. Compio)
Linkback:
https://tubagbohol.mikeligalig.com/index.php?topic=71602.0
