MikeLigalig.com

Ni Jojo C. Ugdol (Banat) | Updated May 16, 2016 - 12:00am
 

CEBU, Philippines - Natusak-tusak sa bala ang lawas sa usa ka 40 anyos nga lalaki human kini mibunot sa iyang revolver sa dihang gipa-surrender sa usa ka polis diha sa Brgy. Lower Pakigne, Minglanilla pasado alas 9 sa nakalabay nga gabii.

Dead on arrival sa tambalanan si Eduardo Gallego Eleccion, usa ka construction worker, ug temporaryo nga nagpuyo sa Calajo-an, Minglanilla apan lumad nga taga San Jose, Mahayag, Zamboanga Del Sur.

Samtang ang polis nga nakapusil mao si Police Officer 1 Melther Kyamko, nagpuyo sa maong dapit ug nadestino sa Naga City Police.

Matud pa ni Senior Police Officer 1 Romeo Barde, imbestigador sa Minglanilla Police nga nahinabi sa Banat News nga nagkagubot ang mga tawo sa maong dapit sa dihang gipagawas sa suspetsado ang iyang .38 revolver atubangan sa mga tawo.

Sumala pa ni Barde nga daghang tawo ang anaa sa maong dapit kay dunay disco sa maong dapit.

Si Barde miingon nga base sa pamahayag sa mga tawo, hubog si Eleccion dihang niibot kini sa armas, ang mga barangay tanod nga nagbantay sa disko daling niadto sa balay ni Kyamko aron magpatabang.

Si Barde miingon nga sa dihang naabot sa maong dapit si Kyamko kauban ang mga barangay tanod nakalakaw na si Eleccion ug misulod sa sudlonong bahin sa kabalayan mao ila kining gisundan.

Sigun pa ni Barde dihang naabtan nagpaila nga polis si Kyamko ug iyang gipahunong si Eleccion apan gikatahong nibunot hinuon sa iyang revolver hinungdan nga napusilan kini ni Kyamko.

Daling gidala sa Minglanilla District Hospital si Eleccion apan nakabsan gayod kini sa iyang kinabuhi human kini nakaangkon og dili mominus sa duha ka samad pinusilan sa lawas.

Sa crime scene nerekober sa mga polis ang usa ka 38 revolver apan nasuta nga wala diay kini sulod nga bala.

“Kinsa gud nagtuo nga wala to’y bala ang revolver niya, unya kay mibunot man og armas mao ‘to nga gi-unhan na lang og pusil sa polis kay basin siya na hinuon ang mapusilan,” matud pa ni Barde.

Sa pagkakaron temporaryo una nga gikostudiya sa buhatan sa Minglanilla Police si Kyamko human kini gi-imbitar alang na usab sa dugang imbestigasyon.  (BANAT NEWS)

Linkback: https://tubagbohol.mikeligalig.com/index.php?topic=82281.0