MikeLigalig.com

Ni Darrel A. Carumba/EIM (Banat) Updated August 02, 2012 12:00 AM


CEBU, Philippines - Tulo ka tawong nagsugal ang naangol dihang gihunongan sa lima ka mga lalaking sakay sa duha ka motorsiklo ug namusil kanila ug dihang nanagan ang mga nanugal gipanguha ang ilang kwartang nangabiyaan sa mahjongan.

Ang insidente nahitabo sa barangay Langtad siyudad sa Naga niadtong Martes sa alas 2:50 sa hapon nga miresulta sa pagkaangol nila ni Naigel Barinque, 29, taga sitio Purok Tambis barangay Inoburan Naga; Wida Heredia, 53, taga sitio Mohon barangay Langtad ug Jovannie Naval, 23, residente sa maong dapit. Lima ka mga batan-ong lalaki ang gitumbok sa mga nakasaksi nga responsable sa krimen nga nagsakay og duha ka motorsiklo.

Matud ni PO1 Junarie Latorre, desk officer sa Naga City Police dihang nahinabi sa Banat News nagsugal og mahjong daplin sa dalan ang mga biktima dihang kalit nangabot ang duha ka motorsiklo ug walay daghang pangutana gipaulanan sila og bala sa mga sakay niini.

Human magkatibulaag ang mga nagsugal gihurot og hipos sa mga gikatahapan ang mga kwarta sa lamesa dayun nagpabuto pa og usab una pa nanakay og balik sa mga motorsiklo ug miikyas.

Si Naval naigo sa tiyan, samtang si Barinque naigo sa walang kamot ug si Heredia naigo sa tuong paa ug gidala sa tambalanan. Ang kapulisan naka- recover og usa ka kabhang sa bala sa kalibre .45 ug laing deformed slug. Wala pa matino sa kapolisan si kinsa ang mga gikatahapan ug motibo sa pagpamusil. - BANAT NEWS

Nakabawi ba kaha ang namusil sa ilang nagasto pagpalit sa mga bala...