Ni Rey Pasaporte (Banat) Updated September 10, 2011 12:00 AM
CEBU, Philippines - Gumikan sa selos, usa ka konduktor sa PUJ naghikog sulod sa tigbayon sa iyang silingan didto sa sitio Biasong, sa barangay Bonbon, bukirang bahin sa siyudad sa Sugbo kagahapon sa kaadlawon.
Ang konduktor nailhan nga si Jose Duran, 34, ug nagpuyo sa maong lugar, kinsa giingong migamit sa higot sa manok nga gibalibod sa iyang liog nga maoy iyang gigamit sa pagbitay.
Ang iyang asawa nga si Violanda maoy nakakita kaniya nga nagbitay na sa balay nga wala pa mahuman sa ilang silingan nga si Junior Parba.
Ang maong balay, haligi pa lang ug busaog ang mga dapat niini nga wala pay bongbong ug sa tunga niini didto magbitay si Duran.
Si Violanda mibutyag sa kapolisan nga human niya makita nga nagbitay na ang iyang bana, iyang gisugo ang iyang dalagitang anak sa pagputol sa pisi nga gibitayan niini aron ilang saw-on sa ubos.
Apan matud pa ni Violanda nga siya ug ang iyang mama wala makapiog sa kabug-at sa iyang bana dihang nahunlak kini, busa milagubo kini ug natagak sa gilawmong 20 ka tiil ug nasabod pa gyud sa haligi sa balay una kini motugpa sa yuta.
Gani gituohan ni Violanda nga ang namatyan niini mao ang pagkatagak ngadto sa yuta .
Si Violanda mitug-an usab sa kapulisan nga niadtong Martes nag-away sila ni Duran tungod kay nangabubho kini kaniya, apan wala ibutyag sa asawa ang ngalan sa lalaki nga giselosan sa iyang bana.
Miinit ang ilang lalis hangtod nga naglinayogay sila ug gani nabun-og ang iyang (Violanda) bukton.
Maayo nalang kay napakgang si Duran sa iyang anak nga bayong-bayong kinsa maoy misanta niini aron nga magkaukang kini sa pakiglinayogay sa iyang asawa.
Matud ni Violanda nga sa wala pa maghikog ang iyang bana mibutyag kini kaniya nga gitaktak siya sa pagka-konduktor sa tag-iya sa PUJ nga iyang gitrabahoan.
Pagka alas-8 sa gabii, niadtong Biyernes naghubog kini matud pa ni Violanda ug sa alas 12:00 na sa tungang gabii kini misaka sa ilang balay ug gihangyo sa iyang inahan nga pakatulgon na.
Ang dalagitang anak ni Duran mitug-an nga sa wala pa maghikog ang iyang amahan nangayo kini og habol ug unlan kaniya apan wala niya kini ka hatagi. Apan kagahapon sa ala 1:00 pasado sa kaadlawon nakurat nalang sila dihang nakita nila kining nagbitay na sa sagbayan sa tigbayon sa ilang silingan.
Hinuon ang kapolisan walay nakitang foul play sa kamatayon ni Duran. (WC)(BANAT NEWS)
Linkback:
https://tubagbohol.mikeligalig.com/index.php?topic=43459.0
