Ni Brenda Batuto (Banat) Updated July 04, 2011 12:00 AM
CEBU, Philippines - Sobra sa P20 mil nga kantidad sa mga alahas ug kwarta ang nadala sa duha ka wala mailhing mga mangingilad gikan sa usa ka 79-anyos nga lola niadtong Sabado sa gabii diha sa barangay Poblacion lungsod sa Argao.
Ang biktima mao si Rosalia Alcala, residente sa maong dapit ug dunay tindahan igo nalang mitaho ngadto sa kapolisan kabahin sa maong hitabo.
Si PO2 Benjie Geyrozaga sa Argao Police Station mibutyag nga ang nahisgutang mga lalaki sakay og usa ka motorsiklo miduol diha sa iyang tindahan ug nangutana kabahin sa kahimtang sa mga senior citizen sa ilang dapit.
Usa sa maong mga lalaki kinsa nagdala og apparatus alang sa pagkuha og blood pressure ang nagpaila nga usa ka doktor ug kunohay gikuhaan niini og BP ang biktima.
Ang maong lalaki mimando sa biktima nga ipahubo ang mga alahas niini aron kunohay matarong og function ang apparatus.
Wala makabantay si Alcala nga ang iyang usa ka parisan nga bulawang ariyos nagkantidad og P3 mil, duha ka bulawang sing-sing, P10 mil, usa ka bulawan nga sing-sing nga dunay batong diamond, P15 mil, usa ka bulawan nga pulseras ug P6,500 nga kwarta nga gibutang niya diha sa kilid gikubit na usa sa nahisgutang mangingilad.
Lakip sa gikubit ang usa ka shoulder bag ni Alcala nga dunay sulod nga mga pinungpos nga yawe ug mga importanteng dokumento.
Dihang nakubit na ang mga alahas ug shoulder bag giingong giingnan ang biktima nga pahuwaton tungod kay hatagan nila kini og gatas nga ilahang kuhaon sa motorsiklong ilang gisakyanan.
Diha na nakabantay ang biktima nga nabiktima siya sa pagpangilad dihang ang nahisgutang mga lalaki wala na mobalik ug wala na usab ang iyang mga alahas, kwarta ug ang shoulder bag. (BANAT NEWS)
Linkback:
https://tubagbohol.mikeligalig.com/index.php?topic=42051.0
