Nila Ni Rey Pasaporte ug Gregg Rubio (Banat)
Ang kamingaw sa iyang hinigugma mao ang hinungdan sa paghikog sa usa ka 22-anyos nga lalaki didto sa Barangay Dawis Norte sa lungsod sa Carmen lalawigan sa Sugbo niadtong Lunes sa kaadlawon.
Si SPO2 Pascual Mendoza sa Carmen Police Station miila sa naghikog nga mao si Juhan Bentoy nanimuyo sa nahisgutang dapit.
Si Mendoza sa iyang asoy sa Banat News miingon nga ang naghikog nga si Bentoy gibati ug kaguol human ang iyang hinigugma nga si Rasel Binaguihan, 21-anyos, taga Cogon West, Carmen ug usa ka nursing student sa usa ka unibersidad dinhi sa dakbayan sa Sugbo, wala na tugoti sa mga ginikanan nga makigkita ni Bentoy.
Sa dugang pakisusi sa kapolisan nasayran nga sila si Bentoy ug ang hinigugma niini nga si Binaguihan sekretong nagpakasal sa sala ni MTC Judge Rosabella Tormis Branch 4 niadtong Hunyo sa miaging tuig. Nakuha sa kapolisan sa dapit nga diin nagpakamatay si Bentoy mao ang usa ka marriage certificate ug mga hulagway sa ilang kaminyoon.
Gituohan nga ang mga ginikanan sa babaye nasayod sa maong sekretong pagpakasal hinungdan nga gidid-an na nila ang ilang anak nga makigkita ni Bentoy tungod kay dako man silang supak niini, tungod sa padayong pagtungha sa ilang anak sa kolehiyo.
Linkback:
https://tubagbohol.mikeligalig.com/index.php?topic=47580.0
