Ni KRIS C. SIALANA
PAHAK ang dalunggan sa usa ka lalaki human gibalusan og paak sa iyang gikaaway niadtong Miyerkules mga alas 10:30 sa gabii sa Barangay 33 ning siyudad sa Cagayan de Oro mismo sa gitrabahoang construction site.
Ang biktima naila nga mao si Alamansa Eryas Utoh, 38, stay-in nga trabahante sa maong construction site, samtang ang suspetsado naila nga si Arnel Andolo, 29, ulitawo, taga Kabanglasan, Bukidnon ug Albert Ligan, pulos kauban ra usab sa trabaho.
Sa nahipos nga report sa Sun.Star SuperBalita gikan Police Station 2 (PS2) sa Cogon, nasayran nga gihatod sa mga guwardiya ang suspetsado human nga nasapong gipaak niini ang biktima.
Gikabutyag nga samtang matulog na unta ang biktima sulod sa ilang barracks, kalit nga misulod ang mga suspetsado ug gituok ang liog dayon gipaak pa sa bukton ang biktima sa walay igong hinungdan nga mibalos kini pinaagi sa pagpaak sa wala nga bahin sa dalunggan sa suspetsado nga miresulta sa pagsinumbagay.
Nasikop sa mga guwardiya ang usa sa mga suspetsado sa dihang nagpakitabang ang biktima pinaagi sa pagsinggit samtang ang laing suspek ang padayon pa nga gipangita.
Maayong pagkapahak matud pa ang dalunggan sa suspetsado kinsa nagpaalim sa Northern Mindanao Medical Center ning siyudad.
Sa pagsulat niini nga balita, ang maong insidente ang nakatala na sa maong buhatan alang sa dugang pa nga imbestigasiyon.
Gipatik sa mantalaang SuperBalita Cagayan de Oro Septembre 11, 2015.
Linkback:
https://tubagbohol.mikeligalig.com/index.php?topic=80939.0
