Ni Rey Pasaporte (Banat) Updated July 08, 2011 12:00 AM
CEBU, Philippines - Usa ka maestra ang nag-atubang karun og imbestigasyon human gireklamo sa apohang babaye ug ginikanan sa 6-anyos nga batang lalaki nga tinun-an sa grade one human nasamad ang ulo sa dihang naigo sa paghapak sa silhig tukog sa maong maestra.
Nahitabo kini alas-3 sa hapon niadtong Biyernes sa miaging semana sa Manggako Elementary School sa barangay Manggako usa ka bukirang dapit sa lungsod sa Ginatilan.
Si PO1 Michael Sevilla sa Ginatilan Police Station sa pakighinabi sa Banat News kagahapon mikumpirmar nga gireklamo ang maong maestra sa mga apohan sa biktima niadtong Hulyo 1 sa alas-7 sa gabii.
Sumala pa sa alegasyon sa mga apohan diha kanila nga nagduwa ang biktima dihang walay ‘warning’ ug kalit nga gihapak ang bata og silhig diha sa ulo sa maestra niini nga si Josefita Lopez.
Ang bata gidala ngadto sa MJ Cuenco Memorial Hospital sa Malabuyoc diin gitahi ang ulo niini. Ang Women and Children’s Desk sa kapolisan mi-refer una sa reklamo ngadto sa barangay.
Apan ang barangay kapitan nga si Loreto Balansag daling mihimo og certification to file action aron pasakaan og kaso si Lopez.
Ang apohang babaye ug uyoang lalaki sa 6-anyos nga batang tinun-an sa grade one midangop sa sibyaanang DyHP niadtong Miyerkules sa buntag sa tulomanon ni Atty. Ruphil Bañoc ug nagpatabang unsay ilang buhaton sa gibuhat sa magtutudlo sa bata.
Sa linaing report sa TV5 Cebu kagahapon, ang magtutudlo nga si Lopez misaysay nga niadtong Biyernes sa hapon labihang sabaa sa iyang mga tinun-an hinungdan nga iyahang gibadlong.
Daw wala siya makaantos sa iyang pasensya gikuha niya ang silhig ‘tukog’ ug gilabay sa bongbong apan mibanda kini ug didto motugpa sa ulo sa biktima hinungdan sa pagkagisi sa ulo sa bata.
Ang kuptanan sa silhig ‘tukog’ giingong ginama sa kawayan hinungdan nga nagisi ang ulo sa bata ug nagkinahanglan pa og tulo ka tahi aron mapilot ang samad.
Si Fabiana, apohang babaye sa biktima sa mao gihapong report mitug-an nga subay sa gisulti kaniya sa iyang apo, naratol ang maestra sa dihang nakita niini nga miagas ang daghang dugo gikan sa ulo niini.
“Ayaw og saba dong ha? Nga gilabay tika, ingna lang nga nahulog ka,†matud pa sa apohan nga mikutlo sa gisulti sa iyang apo nga maoy gitudlo sa maestra nga irason ngadto sa iyang mga ginikanan ini og abot niya sa ilang balay.
More at:
http://www.philstar.com/Article.aspx?articleId=703792&publicationSubCategoryId=101Linkback:
https://tubagbohol.mikeligalig.com/index.php?topic=42148.0
