Ni Guam P. Logroño
http://www.sunstar.com.ph/superbalita-cebu/Monday, February 18, 2013
USA ka 51-anyos nga biyuda namatay human gidunggab og kasiyam sa nagkadaiyang parte sa lawas, sa alas 5:00 sa kaadlawon kagahapon sa Barangay Kayam, lungsod sa San Remegio.
Si Editha Seinadjan, 51, biyuda, tag-iya og sari-sari store ug nagpuyo sa nahisgutang lugar, patay dihang nadangat sa Cebu Provincial Hospital sa dakÂbayan sa Bogo human nakaangko’g samad dinungaban sa wala ug tuong dughan, tuo ug walang hawak, usa sa bat-ang ug upat sa liog.
Si SPO1 Johannesky Ynot, imbestigador sa San Remegio Police nga nahinabi sa Sun.Star Superbalita, nagkanayon nga ang biktima naninda kini subay sa kapistahan sa ilang barangay.
Nipauli nga nag-inusara pagka kaadlawon dihang duol na unta sa ilang panimalay mga 35 metros ang gilay-on, kalit lang siyang giataki sa pagdunggab sa wala pa matinong mamumuno.
Ang bayaw nga si Eleizer Seinadjan, 54, maoy nipahibalo sa kapulisan kalabot niini hinungdan nga sa pag-abot sa mga pulis gidali sa pagdala sa tambalanan gideklarar nga patay.
Matod ni SPO1 Ynot, gisalikway nila ang motibo nga tulis sa krimen sanglit kompleto ang mga alahas sa biktima -- bulawan nga kwintas, ariyos, singsing, porselas ingon man ang daghang kwarta niini nga ilaha pang i-imbentaryo uban sa kabanay.
Gipadayag niini nga estoryahon pa nila ang kabanay sa biktima kon wala bay mga tawong gikaaway diha sa ilang lugar nga posibling dunay rason sa pagpatay.
Hinuon, ilang ilakip sa imbestigasyon ang “love triangle†nga isyu sanglit gikatahong dunay gikarelasyon ang biktima diha sa ilang lugar.
Sumala pa nga ang nihimo sa krimen duna gyu’y grabing kalagot ngadto sa biktima, kinsa walay kaluoy nga nitusaktusak sa pagdunggab sa mahait nga butang.
Wala hinuo’y timaalhin nga gipanamastamasan ang pagka babaye sa biktima kinsa naabtan nila sa daplin sa dalan nga nag-ubo nga naligo sa kaugaliÂngong dugo.
Linkback:
https://tubagbohol.mikeligalig.com/index.php?topic=68801.0
