Ni Jojo C. Ugdol/GMR (Banat) | Updated October 2, 2014 - 12:00am
CEBU, Philippines - Gumikan sa kauwaw kay gibunalan og takong sa inahan atubangan sa iyang mga barkada, naghikog ug namatay ang usa ka 18-anyos nga lalaki sa barangay Dalahikan, Samboan niadtong Lunes sa hapon.
Ang naghikog mao si Alexander Lemos, nagpuyo ra usab sa Barangay Dalahikan. Matud pa nga nasuko si Norma Lemos nga gikuha sa iyang anak ang sound system sa ilang paryente sa pikas balay aron unta gamiton sa lingaw-lingaw kay nagsaulog sa piyesta ang ilang lugar.
Matud ni PO1 Jason John Hiramis sa Samboan Police nga ang inahan ang gipabantay sa balay sa ilang paryente niadtong higayuna.
Sa kasuko sa inahan, atubangan sa mga higala gikasab-an ug gibunalan og takong ang batan-on kinsa nangluod ug miuli sa ilang balay.
Nikuha og sundang ang anak ug miingon sa iyang inahan nga magpadunggab kini.
Nibalibad ang inahan apan nibahad ang anak nga kung dili siya dunggabon, siya maghikog.
Sa kahadlok sa inahan dali kini nga midagan paingon sa buhatan sa kapolisan ug nagpakitabang sa pagtuo nga tinud-on sa iyang anak ang paghikog.
Ang ig-agaw sa nagpakamatay nga usa ka menor de edad ang nakakita nga mikuha og pisi si Lemos ug dayon higot sa iyang liog ug gibaat sa beam sa ilang balay ug nagbitay.
Dali pa unta nga mitawag og pakitabang ang menor de edad sa ilang silingan apan kini patay na sa dihang nakuha sa gibitayan. (BANAT NEWS)
Linkback:
https://tubagbohol.mikeligalig.com/index.php?topic=79050.0
