Ni Darrel Carumba (Banat) Updated August 25, 2011 12:00 AM
CEBU, Philippines - Baho na ang patay’ng lawas sa usa ka lalaki nga nagsugod na og kadugta dihang nakaplagan sa usa ka mangingisda nga naglutawlutaw sa kadagatan sa barangay Lambusan sa lungsod sa San Remegio niadtong Martes sa alas 5:30 sa hapon.
Padayon pa ang kapolisan pag-ila sa maong patay’ng lawas nga gibanabanang lima ka tiil ang gitas-on, nag-shorts og kolor brown, apan wala nay senina.
Subay sa inisyal nga imbistigasyon sa kapulisan , si Manuelito Abines, maoy nakadiskubre sa patay’ng lawas dihang iyahang nasaghiran sa iyang bugsay samtang siya nagsakay sa iyang sakayan hinungdan nga nidunggo dayun siya ug gi-report sa kapulisan.
Sa pag-responde nila ni SPO1 Nicolas Navales ug mga kaubanan sa municipal health officer nga si Dr. Edgar Espinosa gidala dayun kini sa punerarya sa lungsod.
Sa paghimo ning balita wala pay mi-claim nga kabanay niini apan matud ni PO3 Wilfredo Bonado sa San Remegio Police Station dihang nahinabi sa Banat News dunay taga lungsod sa Aloguinsan ang mitawag sa ilang buhatan ug nagpakisayod tungod kay nawad-an sila og kabanay hinungdan nga gitambagan nila kini pagsusi sa nakaplagang patay. (BANAT)
Linkback:
https://tubagbohol.mikeligalig.com/index.php?topic=43130.0
