Ni Darrel Carumba (Banat) Updated November 06, 2011 12:00 AM
CEBU, Philippines - Patay ang usa ka 16-anyos human matumba ug nadat-ugan sa punoan sa kapayas nga iyang gikatkat diha sa sitio Panaghiusa barangay Tunghaan lungsod sa Minglanilla niadtong Biyernes sa alas 2:00 sa hapon.
Ang patay nang nadangat sa tambalanan mao si James Sedon, 16, tinun-an sa high school nga molupyo sa maong lugar kinsa nakaangkon og grabeng kadaut sa kalawasan tungod sa nahitabo.
Matud ni PO2 Abelino Seloria sa Minglanilla Police Station dihang nahinabi sa Banta News ang bata naibog sa daghang mga bunga sa kapayas diha sa ilang silingan nga nangahinog na.
Nakahunahuna kini pagsaka aron sa pagpamupo niini bisan paman sa kahabog niini nga may gitas-on nga moabot og 10 metros.
Apan pag-abot na sa tumoy nga bahin ug magsugod na unta og pamupo sa bunga si Sedon kalit nga mitakilid ug miyungyong ang puno-an ug dayung lahos og katumba.
Ang bata nga naggakos sa punoan maayong pagkalamba sa ubos ug naigo sa punoan. Sumala pa nga napantok ang ulo niini sa mga bato sa yuta.
Gisuwayan unta dayun kini og dala sa Minglanilla District Hospital sa mga silingan apan dangtan ang pipila ka gutlo namatay gyud kini tungod sa seryosong kadaut nga na-angkon sa lawas ug ulo niini.(EIM) (BANATNEWS)
Linkback:
https://tubagbohol.mikeligalig.com/index.php?topic=44134.0
