Ni Flor V. Querubin
Saturday, August 20, 2011
TULO ka mga bayut nangasikop human sa 16 ka oras sa ilang giingong pagtulis sa usa ka batan-ong lalake sa hilit nga dapit sa barangay Pusok, dakbayan sa Lapu-Lapu.
Ang mga suspek gitumbok sa kapulisan nga makadaghan na makabiktima apan wa lang gyud mangapriso kay wa mokiha ang ilang unang mga biktima.
Ang tulo ka mga suspek giila nga sila si Rommel Flores, 26; Paul Balaod, 31 ug Tranquilino Jubay, 24, pulos way mga trabaho, mga lumolupyo sa Barangay Pusok, sa mao nga dakbayan.
Gibutyag sa hepe sa Police Station 5 sa Lapu-Lapu City Police Office (LLCPO) nga si PCInsp. Conrado Manatad nga ang nahisgutang mga dinakpan pulos notadong mga tulisan.
Gani, makatulo na ka mga higayon nga sila nadakpan sa kasong pagpanulis ug kawat sa LLCPO.
Matod niya nga mga suspek usab sila sa laing tulis sa dakbayan sa Mandaue.
Matod pa ni Manatad sa dihang nahinabi sa Sun.Star Superbalita nga nanga-dismiss ang mga kaso batok sa tulo sanglit wa manunga ang mga nabiktima sa gikatakdang mga husay sa korte.
Base sa pasiunang imbestigasyon sa Station 5, usa ka Hermond Ducao, 24, ulitawo, taga-sityo Acacia Natividad Arca, Barangay Pusok nidangop sa kapulisan niadtong miaging kadlawon sa dihang gitulis sa tulo ka mga bayut.
Asoy pa ni P03 Ignacio Mabia nga niadtong Biyernes sa alas 3:40 sa kaadlawon dihang mopauli na unta ang biktima sa iyang gipuy-an, kalit nga niduol ang usa ka bayut kaniya ug nangutana kon asa ang iyang padulngan.
Samtang nagkalingaw og istorya ang biktima ug suspek, adunay duha ka mga bayut ang ningduol dayong tion sa usa ka hait nga butang diha sa kilid ug luyo nga bahin sa lawas ni Ducao.
Ningdeklarar dayon kini og tulis.
Nakuha sa biktima ang iyang pitaka nga adunay P5,000 ug mga importanteng dokumento, dali nga misibat ang tulo ka mga bayut.
Sa gihimong follow-up operation sa kapulisan, base sa gisulti sa mga saksi nga nakaila kanila, nianang mga alas 7:00 sa gabii niadtong Biyernes, nadakpan sila si Flores, Balaod ug Jubay nga positibong giila sa biktima nga maoy ningtulis kaniya.
Mga suspek gipangtanggong na sa LLCPO. --Gipatik sa mantalaang SuperBalita Cebu Agosto 21, 2011.
Linkback:
https://tubagbohol.mikeligalig.com/index.php?topic=43078.0
Topic: Nadakpan ang 3 ka bayut nga banggiitang mga tulisan sa Lapu-Lapu (Read 765 times)