Ni Sheriza Mae R. Uy (Banat) | Updated February 26, 2016 - 12:00am
CEBU, Philippines - Duha patay, pito ang naangol human nagkabangga ang usa ka multicab ug usa ka motorsiklo diha sa Brgy. Agujo sa Lungsod sa Daanbantayan niadtong Miyerkules sa gabii.
Giila ang duha nga namatay mao sila Jennifer Pitogo, 29, ug Chonalyn Conde, 21, kinsa maoy sakay sa motorsiklo samtang naangol ang laing angkas nga si Agloriosa Tanawan, 23.
Si Police Officer 3 Orland Condes sa Daanbantayan Police Station nagkanayon nga gidudahang nakainom ang drayber sa multicab nga si Anthony Llever, 31.
Lakip sa mga sakay sa multicab mao sila si Syndre Delos Angeles, 25; Melvin Llever, 18; John Leo Dublin, 19; Jayren Delabajan; 24 ug Teddjavee Arrogante, 18. Nasayran nga padung sa Poblacion ang motorsiklo samtang gikan usab sa maong barangay ang multicab.
Sumala pa sa imbestigasyon, sila Llever ni overtake sa usa ka trisikad apan tungod kay kurbadahon ang dalan wala kini makabantay sa gikasugat nga motorsiklo nga gimaneho ni Pitogo hinungdan sa ilang panagbangga.
Tungod sa kakusog sa impact nangalagpot ang tanang sakay sa duha ka sakyanan ug daling gidala sa tambalanan apan dead on arrival sila si Pitogo ug Conde. (BANAT NEWS)
Linkback:
https://tubagbohol.mikeligalig.com/index.php?topic=81938.0
