Ni Darrel Carumba (Banat) Updated March 20, 2011 12:00 AM
CEBU, Philippines - Nalungag ang agtang sa usa ka mag-uuma human kini gipusil samtang nanan-aw og sugal nga tong-its sa iyang silingan sa bukirang bahin sa barangay Apo sa lungsod sa Argao kagahapon sa alas 12:00 pasado sa sayong kaadlawon.
Ang biktima mao si Jojo Lasaga Careon, 26, samtang padayon pang gipangita sa kapolisan ang duha ka wala mailhing mga lalaki nga responsable sa krimen.
Matud ni PO1 Brian Yosores sa Argao Police dihang nahinabi sa Banat News nga nagtan-aw ang biktima og tong-its sud sa panimalay sa pamilyang Blanco dihang miusig ang mga iro.
Ang biktima giingong miabli dayon sa pultahan aron sa pagsusi apan dali kining nanirado og balik, namatikdan nalang nilang adunay mga matang milili sa bungbong nga kawayan ug may sumbohang migimaw dayon mipaka-paka ang buto sa armas.
Ang biktima nga nagkawo niadtong higayuna naigo sa iyang sentro sa agtang ug milapos ang bala sa luyong bahin sa ulo ug diretsong nahagba sa sugalan.
Apan wala pa matagbaw ang mga gikatahapan gibukbok nila ang jalousy sa bintana hinungdan nga naglumbaanay og dagan ang mga tawo diha sa sulod sa kwarto dayon hasta sila gipamusil apan walay nangaigo.
Dali usab nga miikyas ang mga gikatahapan una pa mangabot ang kapolisan, dunay pagduda ang mga polis nga posibleng ang target sa mga kriminal mao ang tagbalay sa maong panimalay ug naalaan lang si Careon. (/EIM) (BANATNEWS)
Linkback:
https://tubagbohol.mikeligalig.com/index.php?topic=39270.0
