Ni EDGAR FUERZAS
PRESIDENT ROXAS, North Cotabato -- Patay ang usa ka mag-uuma human gipusil sa iyang silingan, alas 2:30 sa hapon niadtong Lunes, Setyembre 12.
Giila ang biktima nga mao si Benito Gilwa, 48, minyo ug molupyo sa Purok A, Barangay Ilustre, President Roxas.
Si Superintendent Bernard Tayong, tigpamaba sa North Cotabato Provincial Police Office nagsulti nga nagkalalis ang biktima ug ang suspek nga si Gaspar Santeria gumikan sa bingkil sa ilang yuta nga giugmad.
Mikuha og 12 gauge shotgun ang suspek hinungdan nga midagan si Gilwa apan gisundan gihapon siya ug gipusil.
Nakahimo pa unta pagbalos ang biktima ug iya sab nga gitigbas ang iyang silingan gamit ang mahait nga sundang.
Ang duha pulos gidala sa President Roxas District Hospital apan gideklara nga dead on arrival si Gilwa gumikan sa grabeng samad sa nagkadaiyang bahin sa lawas gikan sa mga bolitas sa shotgun.
Samtang grabe sab ang kahimtang ni Santeria.
Gikanayon sa pamilya sa napatay nga sige lang og panghagit og away ang suspek ngadto sa ilang pamilya gumikan sa personal nga kasuko niini sa utlanan sa ilang uma.
Ang kapulisan sa President Roxas Municipal Police Station padayon nga nag-imbestiga sa hitabo.
Gipatik sa mantalaang Superbalita Davao Septembre 14, 2016.
Linkback:
https://tubagbohol.mikeligalig.com/index.php?topic=82752.0
Topic: Mortal kombat tungod lang sa utlanan sa uma: usa talandugon, usa naimpas gyod (Read 643 times)