Friday, March 2, 2012
STO. TOMAS, Davao del Norte -- Sa dili madugay, makabaton na og moderno ug standard nga Crocodile Slaughter House (CSH) ang probinsiya sa di pa moabot ang tunga-tungang bahin ning tuiga tuiga.
Ang maong ihawanan nikantidad og P5 milyones nga padayong gipanday didto sa Purok 5, Barangay New Katipunan, Sto. Tomas ug gipanag-iyahan sa JK Mercado and Son's Agricultural Incorporated (JKMS).
Sumala pa nga ang CSH maoy nag-inusarang ihawanan sa tibuok isla sa Mindanao.
Gisugdan sa pagpanday ang gambalay niadto pang nakalabay'ng tuig human naaprobahan sa mga barangay opisyal sa maong dapit ang Resolution Number 19 series of 2011, pangulohan ni Association of Barangay Captains (ABC) President Armando Torres.
Ang maong resolution giaprobahan sa Sangguniang Bayan (SB) sa maong lungsod sa pagpanguna ni Bise Mayor Daniel Batosalem Jr.
Sumala nila barangay secretary Girlie Inson ug Jamela Macarimban Recto, barangay treasurer, nga ang maong kompaniya dako kaayo'g tabang sa barangay sanglit halos 90 porsiyento sa mga trabahante sa JKMS taga New Katipunan.
Gitug-an sa duruha ka mga opisyales nga sa kasamtangan, ang ilang Internal Revenue Allotment karong tuiga nikabat og P2,299,355 ug posibling motaas pa ang kita ilabina sa kamugnaan sa CSH ilabi na sa hisgutanang Real Property Tax.
Subay niini, gisulti ni Ely Bataican, sanitary inspector sa barangay, nga walay problema ang maong ihawanan sa buaya kay sa wala pa gisugdan ang pagtukod niini, tanang rekisitos gikan sa National Meat Inspection Commission na-comply na sa kompaniya.
Nasayran nga usa ka standard nga ihawanan didto sa kaulohan maoy gisunod aron walay mga reklamong manggawas atol sa operasyon niini.
Ang JKMS dunay kapin 2 mil ka mga binuhing buaya ug uban niini ihawunon na ug ang karne ginabaligya sa mga dagkong hotel sa Manila ug sa ubang nasud.
Samtang ang mga panit ginahimo nga mahalong bag ug mga sapatos. (Teddy Cabana, SuperBalita Davao)
Linkback:
https://tubagbohol.mikeligalig.com/index.php?topic=47950.0
