MikeLigalig.com

Barangay tanod nanigbas napriso
Ni Bryner L. Diaz (Banat) | Updated May 23, 2016 - 12:00am
   

CEBU, Philippines - Gitanggong karon sa karsel sa Borbon Police Station ang usa ka tiguwang nga barangay tanod human siya nakatigbas og 61-anyos nga lalaki kay nasakpan niya nga misulod sa balay sa iyang anak.

Si Rosalio Sabredo, 73-anyos, nakasakop gyud nga si Celestino Villamor misulod sa panimalay sa iyang anak babaye pasado alas 11 sa gabii kaniadtong Sabado didto sa Barangay Don Gregorio Antigua sa lungsod sa Borbon.

Base sa imbestigasyon sa kapolisan nga ang tanod nag-roving sa hacienda nga may tanom nga mga saging nga iyang gibantayan. Gihapit ni Sabredo ang balay sa iyang anak nga si Sabrena.

Apan nakugang ang tanod dihang nakita niya nga misulod sa balay si Villamor bisan og lawom na ang kagabhion.

Diha-diha gipangutana sa tanod si Villamor kun nganong naa siya sa sulod sa balay apan igo lang kini nga mitubag nga wala siya’y sala.

Pagkadungog sa tiguwang tanod sa tubag ni Villamor, abtik kini nga mihulbot sa iyang gitakin nga sundang ug gitigbas niini si Villamor sa pipila ka higayon.

Si Villamor nakaangkon og tinigbasan sa iyang ulo ug kamot kay nagsige kini’g panagang.

Ang samaran nga si Villamor gitabangan sa ilang mga silingan ug gidala sa Juan Dosado Memorial Hospital sa Borbon apan gibalhin ra sa Vicente Sotto Memorial Medical Center sa dakbayan sa Sugbo.

Ang tiguwang tanod midali ra usab pagtahan sa iyang kaugalingon ngadto sa ilang kapitan sa barangay. (BANAT NEWS)

Linkback: https://tubagbohol.mikeligalig.com/index.php?topic=82303.0