Ni Guam P. Logroño
Saturday, February 26, 2011
LALAKENG hubog namatay human nilihay sa iro nga nilabang sa karsada samtang nagmaniho sa iyang motorsiklo ug nabangga na hinuon sa poste sa kuryente kagahapon sa kaadlawon sa national highway sa Barangay Arpili, lungsod sa Balamban, Sugbo.
Si Ramel Abayon, 29, dunay kapuyo, trabahante, kasamtangang nagpuyo sa Barangay Prensa, lungsod sa Balamban, Sugbo apan lumad nga taga Davao, dead-on-arrival (DOA) sa Balamban District Hospital.
Si PO3 Julius Obañana, desk officer sa Balamban Police nga nahinabi sa Sun.Star Superbalita, niingon nga ang biktima haguros nga nakapadagan sa gimanihong motorsiklo gikan sa dakbayan sa Toledo.
Apan sa iyang pag-abot sa nahisgutang lugar, kalit lang nilabang ang usa ka iro, hinungdan nga iyang gilihayan.
Sa iyang paglikay, nasarasay ang motorsiklo ug wa na makontrolar ang manobela ug nibangga sa poste sa kuryente.
Daling gitabang sa mga residenti ang biktima ug gipasakay sa laing motorsiklo dayon gidala sa tambalanan sa Balamban, apan gideklarar nga DOA.
Gipatik sa mantalaang SuperBalita Cebu Pebrero 27, 2011. Linkback:
https://tubagbohol.mikeligalig.com/index.php?topic=38348.0
