Ni Flor V. Querubin
LAWAS sa construction worker nibuto gumikan sa kakusog sa boltahi dihang siya nakuryentehan sa high tension wire sa National Grid Corp. kagahapon sa mga alas 8:21 sa buntag.
Milagrong nabuhi ang biktima, kinsa giingong nalabay dihang nakuryentihan.
Hinuon, nakaangkon og 3rd degree burns ang biktima nga si Nelson Remedios, 37, minyo, taga-Banawa, Guadalupe, dakbayan sa Sugbo.
Siya kasamtangan nga nagpaalim sa iyang mga paso sa nagkadaiyang bahin sa iyang lawas sa Vicente Sotto Memorial Medical Center (VSMMC).
Base sa initial nga imbestigasyon sa Homicide Section sa Lapu-Lapu City Police Office (LLCPO) nga nagbira og kabilya ang biktima sa rooftop sa gi-construct nga three- storey building sa Barangay Pusok, Lapu-Lapu.
Wa makabantay si Remedios nga nasabod sa high tension wire sa NGC ang kabilya nga iyang gialsa nga niresulta sa iyang pagkalabay.
Nakaangkon siya og grabeng mga paso sa dughan ug ubang bahin sa iyang lawas.
Sigun pa sa mga nakakita sa hitabo nga human sa impact nibuto ug nagsiga-siga ang lawas ni Remedios sa kakusog sa boltahi nga nisud sa lawas niini.
Didto siya nitugpa sa sementado nga rooftop ug nangagisi ang iyang gisul-ob nga t-shirt ug karsones.
Dali nga nirespondi ang mga sakop sa Emergency Rescue Unit Foundation (ERUF) ug gidala sa VSMMC.
Pulong pa sa mga nakasaksi nga naka-survive si Remedios sa aksidente sanglit nakagawas man ang kuryente sa iyang lawas ug nakabuhi usab sa kabilya nga iyang gi-alsa diin nagsubay ang kuryente gikan sa high tension wire.
Linkback:
https://tubagbohol.mikeligalig.com/index.php?topic=35539.0
