MILAGRO nga nabuhi pa ang usa ka lalaki kinsa dunay daghang tinigbasan sa lawas dihang napalgan nga nagbuy-od tunga sa dalan alas 3:50 kagahapon sa kaadlawon didto sa Talisay, Times Beach, Barangay 76-A Bucana, siyudad sa Davao.
Padayon ang gihimong imbestigasyon sa Talomo Police Station sa pag-ila sa lalaki kinsa nagpangedaron og 28-anyos, 5'6" ang gitas-on, human napalgan sa mga residente.
Ang biktima unang napalgan sa usa ka taxi driver nga si Xander Alcala nga nagbuy-od ug napuno sa tinigbasan sa agtang, likod ug liog, duna pay dinunggaban sa iyang hawak.
Daling miresponde ang paramedics team sa Central 911 ug gidala ang biktima sa Southern Philippines Medical Center (SPMC).
Nagtuo ang mga residente nga gihagbong lang ang biktima sa lugar, sanglit wala silay namatikdan nga kasikas niadtong mga orasa ug kalit nga mibutho ang biktima.
Sukad sa pagsuwat ning balita, padayong gitambalan ang biktima sa SPMC samtang ang kapulisan padayong nag-imbestiga aron mailhan ang buot mopatay kaniya. (Jeepy P. Compio)
Gipatik sa mantalaang SuperBalita Davao Septembre 29, 2015.
Linkback:
https://tubagbohol.mikeligalig.com/index.php?topic=81071.0
