Ni Darrel Carumba (Banat) Updated August 25, 2011 12:00 AM
CEBU, Philippines - Napakgang sa usa ka polis nga off-duty ang naghuramentadong midwife kinsa miunay og hostage sa iyang anak ug duha ka pag-umangkon ug usa ka igsoon didto sa barangay Bogo, lungsod sa Argao kagahapon sa ala 1:00 sa kaadlawon.
Ang suspetsado mao si Joan Lantod, hingkod, dalaga, molupyo sa maong lugar ug kanhi midwife sa Cebu City Medical Center (CCMC).
Si PO1 Gerard Toquiro sa Argao Police Station, kinsa silingan sa suspek maoy mipakgang sa maong pagpang-hostage nga gihimo sa suspek.
Si PO1 Toquiro mibutyag sa Banat News nga bisan day-off siya niadtong tungora, gisangpit siya sa iyang mga silingan gumikan sa kagubot nga nahitabo sulod sa pinuy-anan sa suspek.
Kini dihang gitanggong niini ang iyang 4 anyos nga anak, duha ka pag-umangkon nga nag-edad og 5 ug 6 anyos uban sa inahan niining si Gemma nga igsoon sa suspek.
Samtang gisirad-an ang pultahan sa lawak sa iyang balay, gibuak niini ang bildo sa bintana, gikuptan kini uban sa usa ka kahoy nga maoy nabalak-an sa mga hostage nga ipuspos kini kanila.
Matud ni PO1 Toquiro nga pag-abot niya sa balay sa suspek nakita niya nga isog na kaayo kini ug lisud nang mapiog busa migamit siya og inutok nga paagi ug nahunahunaan niya ang iyang flashlight.
Dihang mitutok kini kaniya, iya dayong gipasigaan sa linte sa iyang ispat ang mga mata niini busa wala kini nahimo gawas sa pagpiyong sa iyang mga mata.
Didto milihok dayon ang mga uyoan ug kabanay sa suspek ug giilog dayon ang gibitbit niining kahoy ug mga bildo, hinungdan nga nakalingkawas ang iyang anak ug duha ka pag-umangkon uban sa iyang igsoon nga luwas gikan sa lawak nga gibilanggoan kanila.
Ang inahan sa duha niya ka pag-umangkon ug uban pa niyang kabanay gikan sa ilang mga ginikanan walay plano sa pagpasaka og kaso batok sa suspek.
Gani naluoy sila niini ug naglaraw sila nga ila kining ipaslak sa rehabilitation center aron maulian ang maayong pangisip niini.
Nasayran usab gikan sa kapolisan nga sa miaging tuig misuol usab ang kalibog sa ulo niini apan tungod kay nabantayan sa iyang mga kabanay wala kini makahimo og salaod.
Wala pa masuta kun unsay sinugdanan sa sakit niini, apan matud pa sa mga kabanay nga dili kini permanenteng sul-an sa iyang sakit. Ang ubang tigpaniid nagkanayon nga kun dili illegal nga druga ang sinugdanan niini, ug dili usab kaliwat, malagmit napasahan lang kini sa gutom ug gikabuhi nga maoy hinungdan nga kun magutman motukar gayud ang dili maayong pinsada niini. (WC)(BANAT)
Linkback:
https://tubagbohol.mikeligalig.com/index.php?topic=43129.0
