Ni Flor V. Querubin
GINANG nga tag-iya og bulitsihan ug nakadaog sa usa sa mga bola sa Suertres Lotto gitulis ug gipatay sa miaging gabii samtang nagkalingaw og tong-its uban sa laing mga magduduwa sa sityo Pag-utlan, Barangay Maribago, Lapu-Lapu City.
Gikatahapang mga tulisan nga magsuon nailhan ug usa niini nadakpan sa mga sakop sa Police Station 2 sa Lapu-Lapu City Police Office pipila ka oras human sa hitabo.
Patay diha-diha ang biktima nga si Leonila Lambojon, 49, adunay live-in partner, taga-Sityo Sabang, Barangay Sta. Rosa, isla sa Olanggo, apan adunay temporaryong gipuy-an sa Maribago samtang ang mga suspek giilang sila si Eddiemar alyas Tata ug Gaga Cosep.
Base sa nahipos nga kasayuran ni P/CInsp. Conrado Manatad, hepe sa Police Station 2 sa LLCPO, nga niadtong Biyernes sa alas 9:35 sa gabii, si Lambojon nagduwa og tong-its uban sa laing upat ka mga magduduwa.
Kalit nga nibutho ang duha ka mga lalake nga nagmaskara ginamit ang itom nga t-shirt aron sa pagtabon sa ilang nawong gawas lang sa ilang mga mata.
Wa magdahom ang mga nagduwa nga adunay dautang tuyo ang maong mga lalake hinungdan nga wa lang nila panumbalinga.
Nangakurat na lang sila dihang kalit nga mibunot sa wa mailhing kalibre sa armas si Eddiemar dayon nipusil sa biktima sa way igong hinungdan.
Asoy ni Manatad sa dihang nahinabi sa Sun.Star Superbalita nga unang kablit sa armas sa suspek mikagar kini.
Apan sa ikaduhang buto diha na gitumong sa tangkugo ni Lambojon hinungdan nga nahagba sa iyang gilingkoran ang biktima.
Inay nga mobiya ang mga suspek, gikuha pa niini ang itom nga beltbag sa biktima dayon misibat sa maong dapit.
Sigun sa kasaligang tinubdan sa Sun.Star Superbalita nga nanag-iya og bolitsihan si Lambojon sa isla sa Olango.
Giingong nagpaninggit kini sa kalipay sa dihang nitama ang iyang gipustahan nga numero sa Suertres Lotto.
Giingong daghang nahibawo nga daugan niadtong higayona ang biktima apan wa pa niya makubra ang iyang dinaog nga giingong moabot sa P45,000 ngadto sa P50,000.
Gituohan nga diha sa iyang belt bag gisulod sa biktima ang iyang winning ticket sa Suertres Lotto ug laing P5,000 nga cash nga gidala sa duha ka mga tulisan.
Matod ni Manatad nga si Eddiemar maoy nipusil kang Lambojon nga ilang naabtan sa sityo Soong, barangay Mactan nga mosulod na unta sa balay sa iyang ugangan sa dihang pagkita sa nagsingabot nga mga pulis. Nirakatil kini sa pagdagan apan ilang nadakpan.
Dugang niya nga sa gihimong interrogation sa suspek, positibo kining giila ni Bonifacia Ompad-Canete, igsuon sa biktima, nga diha sa nahitaboan niadtong higayona.
Padayon pa nga gisubay ang nahimutangan ni Gaga kinsa maoy mikuha sa belt bag sa biktima diin giingong gihipos ang ticket sa Suertres Lotto.
Nasayran nga si Lambojon didto sa maong sityo sanglit gisaulog sa maong dapit ang kapistahan diin siy nibutang og bulitsihan.
Gipatik sa mantalaang SuperBalita Cebu Septembre 30, 2012.
Linkback:
https://tubagbohol.mikeligalig.com/index.php?topic=55299.0
