MikeLigalig.com

Ni Flor V. Querubin
Thursday, April 12, 2012


NABUHI ang buot untang magpakamatay pinaagi sa paglayat sa unang taytayan sa Mandaue ug Mactan, apan ang mananagat nga namana aron mabuhi siya ug ang iyang pamilya namatay human matugpahi.

Nagubot sa miaging gabii ang mga tawo sa sityo Seaside, Barangay Pajo, dakbayan sa Lapu-Lapu sa kusog nga pagpaka sa Mactan Channel.

Ilang nasuta nga adunay lalake nga nilayat sa tulay ug didto nitugpa sa mananagat nga motunga na unta gikan sa ilawom sa dagat diin siya namana.

Gidali sa pagdala sa tambalanan sa Emergency Rescue Unit Foundation (Eruf) si Danilo Sison, 59, minyo, taga M. Patalinjug Ave., Sityo Pansane, Brgy. Babag human mawad-i sa panimuot tungod sa impact sa lawas ni Ano (di tinuod nga ngan), mga 30-40 anyos, taga Sityo Radar, Brgy. Babag.

Namatay si Sison sa tambalanan.

Base sa nahipos nga impormasyon sa Crime Against Person’s Desk sa Lapu-Lapu City Police Office (LLCPO) nga maghikog unta si Ano nga gihulagway nga adunay deperinsiya sa panghuna-huna.

Naabtan sa mga sakop sa Police Station 3 nga gitabang si Sison sa mga sakop sa Eruf kay nawad-an sa panimuot samtang gidali sa pagdala sa Station 3 si Ano aron i-likay sa naglungot-lungot nga mga tagtungod sa maong managat.

Nadala pa sa Mactan Doctor’s Hospital si Sison, apan human sa pipila ka minutos nakabsan sa iyang kinabuhi.

Ingon sa nikuko ang liog ni Sison.

Nagpunay lang og duko nga nagpadunghay sa iyang tag-as nga buhok si Ano ug nagdumili sa pagtubag sa mga pangutana sa imbestigador kon nganong maghikog unta siya.

Si Sison nakakuha og lima ka mga dagkong isda nga iyang gibutang sa iyang knapsack nga netbag ug mobalik pa unta sa pagsawom aron sa pagpamana ginamit ang iyang improvised spear gun.

Ang kauban sa pagpamana sa biktima nga si Lean Solasco Cabras nakakita pa ni Ano nga naggakos sa poste sa tulay ingon sa nahadlok nga anuron sa sulog sa dagat human sa iyang paglayat.

Samtang si Sison napalgan nalang nga naglutaw na pipila ka metros nga gilay-on nga wa nay pani­muot.

Ang asawa ni Sison nga si Ma. Theresa nitug-an nga wa na silay tinguha nga mosang-at og reklamo batok kang Ano ingon man pagpa-ubos sa autopsy sa lawas sa iyang bana.

“Di nalang mi mokiha. Buangon man gud to (Ano),” magul-anon nga tubag ni Teresa sa dihang gihinabi sa mga tigbalita dungan sa paglingo-lingo nga nahinugon sa kamatayon sa iyang kapikas.

Naabtan pa sa Sun.Star Superbalita ang basa nga wet suit sa namatay nga gihayhay ug ang netbag nga gigamit niini nga gisab-it sa abuhan diha sa ilang balay. --Gipatik sa mantalaang SuperBalita Cebu Abril 13, 2012.

Linkback: https://tubagbohol.mikeligalig.com/index.php?topic=49292.0