(Banat) Updated January 01, 2012 12:00 AM Comments
CEBU, Philippines - Gihigpitan karon sa Cebu City Anti-Mendicancy Task Force (CCAMTF) ang pag-monitor sa giingong mga tawo nga giingong motuyo og anhi dinhi sa Sugbo aron manglimos sa kadalanan nunot sa nagsingabot nga Sinulog.
Una nang nag-alerto ang CCAMTF sa milabay pang bulan apan gituohan nga modaghan ang makililimos kung magkaduol na ang Sinulog sumala pa sa hepe sa CCAMTF nga si Isabelita Ganub.
Sa milabay’ng buwan si Ganub mibutyag nga adunay mga makililimos gikan sa Mindanao nga midayo gyud dinhi nunot sa kapaskohan. Gituohang magbilin ang maong mga tawo hangtud liwas sa Sinulog.
Kalabot usab sa problema sa mga makililimos nga Badjao gikatakdang modangop si Ganub sa National Commission on Indigenous People (NCIP) aron dali nga masulbad ang maong suliran.
Padayon ang dakbayan sa kampanya niini pagpatuman sa anti-mendicancy ordinance sa siyudad batok sa mga manaygonay sa kadalanan ilabi na niadtong diha sa sulod sa mga sakyanang pasaheroan.
Aminado si Ganub nga dunay ubang makililimos ang magminaro sanglit ang iya rang grupo ang bantayan ug daling manago sa higayon nga mag-roving sila sa kadalanan.
Dugang usab niya nga dako og matampo ang mga opisyales sa barangay sa pagsulbad sa nahisgutang suliran. (Sanden J. Anadia/EIM) (BANAT)
Linkback:
https://tubagbohol.mikeligalig.com/index.php?topic=45118.0
