Ni DOMILYN R. PICO
DAVAO DEL NORTE -- Usa ka 18 anyos nga estudyanteng babaye midangop sa buhatan sa kapulisan human gibugno ug napaakan ang liog sa gikaaway sud sa diskohan, alas 12:45 sa kaadlawon didto sa Highlight Restobar sa dalang Lapu-lapu, dakbayan sa Tagum, kagahapon.
Biktima giila nga Lilia (tinuod nga ngalan gitago sa Superbalita), dalaga, taga Compostela Valley Province.
Sumala pa nga naglingaw-lingaw lang ang biktima kuyog ang mga barkada sud sa diskohan, dihang kalit nga dunay kagubot nga nahitabo sa mga batan-on.
Gialegar sa biktima nga usa ka Mae (apilyedo gitago tungod menor-de-edad), 17, estudyante usab ug taga dakbayan sa Tagum ang miatake kaniya.
Nasayran nga misukol og pakigbugno ang biktima kang Mae apan bisan og maguwang siya niini, siya matud pa ang nakahiagum og tuo-wala nga laparo sa suspek.
Wa pa matagbaw ang suspek, matud pa, gipaak pa gayud ang iyang liog nga nakahiagum og samad ug bun-og.
Ala una sa kaadlawon, kagahapon, gilayon nga midangop ang biktima sa kapulisan sa Tagum City Police Station apan gipangita pa ang suspek.
Hangtud sa pagsulat ning balita, wa pay taho unsa ang gidangatan sa reklamo sa biktima.
Wa na usab matino kung lalaki o uyab ba ang hinungdan sa maong kagubot sud sa diskohan.
Gipatik sa mantalaang Superbalita Davao Hunyo 17, 2016.
Linkback:
https://tubagbohol.mikeligalig.com/index.php?topic=82367.0