Nangutang gipahimuslan sa motel
Ni Alger Dura
Wednesday, October 17, 2012
USA ka Indian national ang nasikop sa kapulisan tungod kay buot makighilawas sa babaye nga mangutang kaniya niadtong Sabado sa gabii.
Ang suspek mao si Pawandeep Kaur Singh, alyas Sunny Mann, 26, ulitawo, nagpuyo sa 306 Almond Drive, Phase 1, Ecoland, siyudad sa Davao.
Si Singh nag-atubang karong og kasong paglapas sa Republic Act 9262 kun Anti-Violence Against Women and Their Children Act of 2004.
Ang suspek gisikop sa mga pulis human gireklamo ni Grace (dili tinuod ang pangalan) kinsa gihagad sa suspek nga makigkita sa Queensland Inn.
Si Grace nagsulti sa iyang affidavit nga nakaila niya ang suspek niadtong tuig 2010 didto sa Kidapawan City.
Ang biktima nagsaysay nga niadtong Oktubre 3, mi-text siya sa suspek nga manghulam siya og kuwarta nga nagkantidad og P15-mil aron iyang ibayad sa tuition.
Gitubag siya sa suspek nga pahuwamon siya kon mosugot siyang mahimo niyang hinigugma.
Oktubre 4, suma sa biktima, mi-text na sab siya kon makahuwam siya, ug gitubag siyang pwede pero magkita sila sa Queensland Inn.
Niadtong Oktubre 10, dugang sa biktima, nagkasabot silang mosulod sa motel, apan dihang iyang gipangayo ang kuwarta, wa kini gihatag sa suspek sanglit maglipay-lipay una siya ibabaw sa kama.
Dihang mibiya na sila sa motel, gihatagan lamang siya og P1,500 sanglit mag-withdraw pa ang suspek sa ATM.
Miingon ang suspek nga offline ang ATM mao nga mokuha og kuwarta sa ilang balay apan wa na mibalik.
Pagkabuntag, gisingil sa biktima ang suspek, apan gibaharan siyang i-upload ang sex video sa Internet.
Tungod niini, midangop ang biktima sa kapulisan nga miresulta sa pagkasikop sa suspek.
Gipatik sa mantalaang SuperBalita Davao Oktubre 18, 2012.
Linkback:
https://tubagbohol.mikeligalig.com/index.php?topic=55922.0
