Ni Raymond Abarcas (Banat) | Updated February 10, 2015 - 12:00am
CEBU, Philippines – Naukay ang mga residente sa Barangay Bato Toledo human sa taho nga gilungkab sa wala mailhing tawo ang usa ka panteyon sa pampublikong sam-ang sa nahisgutang lugar niadtong adlaw nga Domingo sa buntag.
Ang mga barangay tanod sa maong lugar ang unang miresponde human nadawat ang taho nga adunay panteyon nga gituyo paglungkab hinungdan nga ila usab nga gipahibalo sa tagtungod niini.
Ang hepe sa mga tanod nga si Eve Macapobre miingon nga nabungkag na ang ibabaw nga bahin sa panteyon nga ginama sa semento ug naukab na usab ang lungon.
Ang mga kabanay sa gilubong sa maong panteyon nga dili buot magpaila nagkanayon nga adunay mga alahas nga gibanabanang mokabat og P20mil ang gisul-ob sa ilang minatay sa paglubong niini pipila ka tuig na ang milabay.
Ang sepultorero sa maong sam-ang kansang pangalan wala makuha namahayag nga wa kini makamatikod nga dunay tawong niguba sa maong panteyon.
Ang kapolisan mihimo na karon og imbestigasyon kun si kinsa kining mga grave robbers nga nangawat sa patay, samtang gipaabot pa usab nila ang pormal nga reklamo gikan sa mga kabanay sa maong gilubong nga minatay. – /EIM) (BANAT NEWS)
Linkback:
https://tubagbohol.mikeligalig.com/index.php?topic=79481.0
