Ni Rey Pasaporte (Banat) Updated December 17, 2011 12:00 AM
CEBU, Philippines - Boluntaryong mitahan sa iyang kaugalingon ngadto sa tanod sa barangay Buhisan ang usa ka batang lalaking menor de edad nga miangkong maoy mipatay sa mahuyang niadtong Disyembre 9 sa kaadlawon diha sa sitio Olibo sa naasoy’ng barangay.
Si Gerson, 17, tinuod pangan ug apelyido gipugngan sa Banat News gitugyan sa tanod nga si Estrella Gabiana ngadto ni Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) kagahapon sa buntag ug gi-presentar ngadto kang Sr. Supt. Melvin Ramon Buenafe.
Si Gabiana miingon nga wala na makaagwanta ang batan-on tungod kay nakonsensya kining maamong ang iyang mga barkada nga malambigit sa krimen nga iyang nahimo human iyang napatay ang biktimang si Felix Alsado, Jr., 23, usa ka mahuyang nga taga sitio Anahaw.
Dunay pagduda ang habig sa banay sa suspek nga posibleng adunay gihimo ang inahan sa biktima nga usa diay ka ‘tambalan’ o usa ka mananambal nga mogamit og pamaagi sa ‘binisaya’ aron dili pakatulgon ang kriminal nga mipatay sa anak niini.
Sumala pa ni Gabiana nga mitug-an kaniya ang suspek nga matag gabii dili kini makatulog tungod kay daw sa hamokon siya sa biktima maong wala na siya makaagwanta pa ug nakadesider nga motahan.
Si Gerson sa iyang bahin, misaysay sa mga tigbalita nga dul-an na sa napulo ka higayon nga siya gigamit sa biktima ug ini’g kahuman hatagan siya’g P200.
Apan sa wala pa niya mapatay ang biktima nag-uban pa sila og inom kauban ang laing duha niya ka barkada ug laing usa ka mahuyang diha sa birthday celebration sa ilang barkadang giila niya nga si Panoy.
Nagsugod sila og inom nianang alas-4 pa sa hapon hangtud nga miabot ang kagabhion ug miuna og uli ang usa ka mahuyang.
Pagka alas-2 sa kaadlawon gihagad siya sa biktima nga makighilawas kaniya ug misaad nga hatagan siya og P200 hinungdan nga nangita sila’g lugar nga kasagbotan ug didto nila kini himoa.
Mitug-an kini nga dili lang kadto maoy unang higayon nga siya gigamit sa biktima ug matag human niini hatagan gyud siya og P200.
Ang suspek mibutyag nga dihang hapit na mahuman sa ilang gibuhat iyaha (suspek) nang gipangutana ang biktima kun asa na ang P200 apan miingon kining (biktima) ‘wala.’
Tungod sa kapungot nga daw giilad siya sa biktima mikuha siya og kahoy nga himuong uling ug iyang gibunalan ang ulo sa biktima makatulo ka higayon hangtud nga nahagba kini ug nakuyapan ug iya pa gyud kining gitiwasan hangtud nga namatay.
Matud sa suspek nakakita ang iyang usa ka barkadang nagpangidaron og 18 anyos pagbunal niya og kahoy ngadto sa biktima apan tungod sa kahadlok midagan ug mibiya kini sa nahitaboan.
Diretso siya’g pauli sa ilang balay ug iyang gisultihan ang iyang inahan sa nahitabo.
Matud ni Luisa, 40, inahan sa suspek nga nahinabi sa Banat News nga iyahang gitambagan ang anak nga motahan nalang sa kapulisan pipila ka adlaw human sa maong hitabo hinungdan nga nagpatabang sila ni Gabiana.
Si Gerson maoy kamaguwangan sa walo ka managsuon ug matud pa sa inahan nabuang sa barkada ang iyang anak ug nagduda siyang nagsugod na kini og suyop og shabu sa nag-edad pa kini og 13-anyos butang nga giangkon usab sa suspek.
Samtang gipadayag ni Buenafe nga ilahang i-turnover sa Department of Social Welfare and Development (DSWD) si Gerson aron mahibaw-an kun angayan ba kining pasakaan og kaso.(/EIM)(BANAT NEWS)
Linkback:
https://tubagbohol.mikeligalig.com/index.php?topic=44818.0
