DUHA ka mga anggulo ang gitan-aw sa kapulisan sa Calinan labot sa kamatayon sa magtiayon kinsa napalgang dunay mga samad dinunggaban ug pinusilan alas 9:30 sa gabii niadtong Martes sa Purok 6, Barangay Dacudao, Calinan District, dakbayan sa Davao.
Si Police Chief Inspector Randy Sambalud, hepe sa Calinan Police Station, nag-ila sa mga biktima nga sila Ritzel dela Cruz Orbeta, 40, ug kapuyo nga si Vilma de Aros Dedios, 48, caretaker sa farm sa retiradong sundalo sa Purok 6.
Sa inisyal nga imbestigasyon ni Police Officer 2 (PO2) Joel T. Guanzon, imbestigador sa Homicide and Arson Section sa presinto diyes, nasayran nga nakadungog ang anak nga si Raymark Ellena Orbeta, 20, sa singgit nga nangayo og panabang ang iyang amahan.
Giingon nga sa wala pa nangayo'g panabang ang biktima, nadungog ni Raymart nga dunay kaistorya ang iyang amahan ug inahan gawas sa ilang balay.
Niadtong tungora, daling migawas ang anak apan gigunitan kini sa usa sa tulo ka mga wa pa mailhing tawo nga naka-bonnet nga may dalang mga hait nga hinagiban dayon gigapos.
Si Davao City Police Office spokesperson Chief Inspector Milgrace Driz nagbutyag sa SuperBalita nga patay nang napalgan ang magtiayon sa tangkal sa baboy.
"Duha atong gitan-aw nga anggulo. Una, kining bulawan daw kay nakakalot ang mag-asawa og bato nga dunay bulawan. Ikaduha, katong personal nga bangi labot sa motor," ingon ni Sambalud nga nahinabi sa Superbalita.
Kagahapon sa buntag, gi-turn over ni Raymart ang dakong bato nga nagsilak-silak nga daw marmol sa presinto. (JPC)
Gipatik sa mantalaang Superbalita Davao Enero 28, 2016.
Linkback:
https://tubagbohol.mikeligalig.com/index.php?topic=81787.0
