Ni Dennes R. Tabar
Wednesday, February 23, 2011
NAMATAY ang usa ka mananagat human niya aksidenteng natulon ang isdang danggit nga buhi dihang iyang gipaak samtang siya nanagat sa barangay Pangan-an, isla sa Olango, dakbayan sa Lapu-Lapu.
Ang biktima giingong nipaak sa isda nga iyang nakuha aron kuhaon gikan sa tumoy sa pana dihang iya kining nakuha niadtong Martes, pasado alas 8:00 sa buntag didto sa sityo Lawis.
Si Pangan-an Barangay Kapitan Virgilio Casiao niila sa biktima nga si Felix Cabilao, nagpuyo sa lugar.
Matod ni Casiao nga si Cabilao, gawas nga mamukot sa iyang pagpangisda, mogamit usab og pana.
Niadtong higayona, siya nisawom sa dagat aron mamana.
Usa ka danggit ang iyang gitiruhan sa pana ug naigo hinungdan nga iya kining gitangtang gikan sa gapasan.
“Unya kanang paagi sa ilang pagkuha kay paakon man na nila. Unya kay buhi pa man (pagkuha niya),†asoy ni Kapitan Casiao dihang nahinabi sa Sun.Star Superbalita.
Matod niya nga nikisi-kisi ang isda ug ni-slide sa iyang kamot dayon nideritso kini sa iyang baba samtang nagkupo-kupo hinungdan nga iya gyud kining natulon.
Sigun sa asoy sa kapitan nga niungot kini sa ubol-ubol ni Cabilao samtang padayon kining nagkupo-kupo sa sulod.
Paglabay sa singko minutos namatay si Cabilao.
“Wala siguro to makaginhawa unya la’ baya kaayo nang danggit. Mao tong deritsog kamatay,†dugang ni Casiao.
Ang mga paryenti ni Cabilao wa na modala pa kaniya sa tambalanan sanglit patay na man.
Gani bisan sa iyang haya, ang danggit wa pa makuha gikan sa iyang ubol-ubol.
Gipatik sa mantalaang SuperBalita Cebu Pebrero 24, 2011.
Linkback:
https://tubagbohol.mikeligalig.com/index.php?topic=38189.0
