Ni Darrel Carumba (Banat) Updated October 23, 2012 12:00 AM
CEBU, Philippines - Usa ka 61 anyos nga mahuyang nakabsan sa kinabuhi human gulgola ang ubol-ubol sa gikainom niyang silingan sa barangay Poblacion, lungsod sa Dumanjug niadtong Domingo sa gabii.
Ang biktima mao si Virginio Janea, 61, usa ka mahuyang nga nagpuyo sa barangay Looc, Dumanjug, samtang ang suspek mao si Wilbert Deniega alyas Japit, 19, ulitawo, nga iyang silingan.
Si PO2 Ramon Chinel, imbistigador sa Dumanjug Police Station mitug-an sa Banat News nga ang biktima ug suspek nag-inom sa wala pa ang hitabo.
Apan dihang nangalasbag na, mitumaw na ang panaglalis sa duha.
Dihang misilaob na sa kapungot ang suspek dali kaayo kining nakalanit sa giluklok niyang kutsilyo ug walay kukalooy nga gipanunggab ang biktima sa nagkalainlaing bahin sa lawas.
Wala pa makuntento ang suspetsado, gigulgol pa ang ubol-ubol sa biktima nga maoy hingpit nga nakabugto sa gininhawa niini.
Dihang nasuta niya nga patay na ang biktima, dali kaayo kining nakaikyas.
Hinuon ang nakasaksi sa maong krimen nga uyoan sa biktima maoy nakapahibawo dayon sa kapolisan.
Didto sa nahitaboan napunitan sa mga polis ang antiyuhos, nagkadugo nga t-shirt, ug sakoban sa kutsilyo sa suspetsado nga maoy gigamit sa krimen.
Nasikop hinuon dayon ang kriminal pipila ka oras human sa hitabo dihang milusad ang kapolisan og hot pursuit operation.
Dihang gisukit sa kapolisan mitug-an kini nga giunahan kuno siya og sumbag sa biktima hinungdan nga iyang gipatay. (/WC) (BANAT NEWS)
Linkback:
https://tubagbohol.mikeligalig.com/index.php?topic=56027.0
