DAKONG bun-og sa nawong ug hubag ang mata sa usa ka polis human nga gibunalan og bato Martes mga ala 1:30 sa kaadlawon sa Upper Puerto, dakbayan sa Cagayan de Oro.
Ang biktima si Senior Police Officer 1 Rey Abecia, 40, taga Mambatangan, Manolo Fortich, Bukidnon ug sakop sa Police Station 6 (PS6) sa Puerto.
Sa impormasiyon gikan sa Northern Mindanao Medical Center sa Cagayan de Oro diin gidala ang biktima nasayran gikan sa kaubang polis nga gisundan sa biktima ang sakyanan nga gituohang adunay sakay nga hijacker.
Gidugang pa nga giatangan niini ang wala usab ikabutyag nga klase sa sakyanan ug gisinyasan ang drayber nga ipahunong hinungdan nga mikanaog ang sakay niini.
Wala makabantay ang polis sa dihang pagnaog sa suspetsado kalit kining gihampak og bato.
Nag-inilogay pa sa armas ang biktima ug ang suspetsado ug nakabuto ug naigo ang suspek.
Giingong naluyahan ang biktima nga polis human usab nga nakaangkon sa samad sa dihang gibunalan og bato hinungdan nga nakapalayo ang suspek dala pa ang motorsiklo sa biktima.
Sa pagsulat niini nga balita ang insidente ang giimbestigahan pa sa kapolisan sa maong dapit ug wala kini giluwatang pahayag sa dihang gihinabi sa Sun.Star SuperBalita. (KCS)
Gipatik sa mantalaang SuperBalita Cagayan de Oro Desiembre 03, 2015.
Linkback:
https://tubagbohol.mikeligalig.com/index.php?topic=81528.0
