MikeLigalig.com

Ni STEPHANIE V. BERGANIO

PATAY ang usa ka maestro nga igo lang unta nga nag-sideline matag gabii isip usa ka habal-habal driver human giluba ug gikuha pa ang motorsiklo kagahapon sa kadlawon sa Tagoloan bridge, lungsod sa Tagoloan, Misamis Oriental.

Giila ang biktima nga si Arlyn John Baslot kinsa usa ka magtutudlo sa Claveria National High School sulod sa duha ka tuig ug matag gabii nag- sideline pagpamasahero og habal-habal sa lungsod sa Tagoloan.

Ang igsuon sa biktima nga si Joel niingon nga mihapit pa sa ilang balay ang biktima kay iyang gipakita ang iyang motorsiklo tungod kay daw adunay deperensya apan dihang natul-id nananghid kini nga mamasahero usa agi og pangyawat tungod sab sa kalisod.

Si Police Senior Inspector Maricris Mulat sa Tagoloan Police Station miingon nga sa inisyal nila nga imbestigasyon posibleng atol sa pagpamasahero sa biktima adunay nagpatuong pasahero ug nagpahatod niini apan paghidangat sa tulay nahitabo ang insidente.

Ang biktima human giluba sa wa mailang tawo gisuwayan og hulog sa tulay apan nasangit kini ug nakita sa pipila ka mga residente gahapon sa buntag nga wala nay kinabuhi.

Gani nagkasamad-samad pa ang iyang mga kamot tungod kay posibleng misukol pa kini sa suspetsado.
Gikasubo kaayo ni Mulat ang nahitabo niini ug mipasalig nga himuon ang tanan nga mahatagan og hustisya ang kamatayon niini ug ingon man marekober ang motorsiklo sa biktima nga gidala sa suspetsado.

Panawagan ni Mulat sa katawhan hilabi na sa lungsod nga makigtambayayong kanila aron mas mapadali ang imbestigasyon labina blanko pa sila sa responsable niini.

Giaghat usab niini ang tanan nga mga habal-habal driver nga ibalik kadtong susama kaniadto nga kung adunay ipanghatod nga pasahero sa mga layo nga dapit o bisan diha ra sa lungsod nga mag log-in sa record book sa ilang buhatan ug isulat ang pangalan, plaka sa motorsiklo ug kinsa ang ngalan sa ilang pasahero nianang oras ug asa ang destinasyon.

Daw dako kini og tabang nga ma-trace ang kinsa man nga mga tao nga adunay dautan nga motibo batok sa mga habal-habal driver.


Gipatik sa mantalaang SuperBalita Cagayan de Oro Agosto 07, 2015.