Ni Darrel A. Carumba/EIM (Banat) Updated November 01, 2011 12:00 AM
CEBU, Philippines - Gireklamo og sexual harassment sa usa ka tinun-an sa high school ang iyang maestro diha sa Tuburan National High School sa lungsod sa Tuburan human kini giingong mi-molestiya kaniya sulod sa ilang eskuylahan.
Ang maong maestro (pangalan gipugngan samtang wala pa pormal nga mapasakai og kaso) giingong daw nakainom niadtong hapon sa Lunes sa milabay’ng semana.
Ang reklamante nga dalagita tinun-an sa 4th year sa maong tunghaan.
Sumala pa ni PO2 Suzeth Colonia sa Women’s Desk sa Tuburan Police Station nga nahinabi sa Banat News na-blotter ang maong insidenti niadtong miaging Miyerkules ug padayon pa ang ilang imbestigasyon alang sa pagpasaka og kaso karung semanaha.
Wala na mohatag pa og dugang detalye si PO2 Colonia sa maong insidente tungod kay padayun pa ang ilang imbistigasiyon.
Apan ang iyaan sa biktima nga nahinabi sa Banat News mibutyag nga padulong na mamauli ang mga bata dihang gipatawag sa maong maestro ang iyang pag-umangkon diha sa lawak-saringan niini.
Mibalik dayon ang biktima apan pag-abot sa sulod sa lawak-saringan gimanduan sa maong maestro ang ubang mga tinun-an nga mahimo na silang makauli ug nahibilin ang biktima.
Sumala pa nga dihang sila nalang duha kalit giduol sa maestro (nga gituohang nakainom) niadtong tungura ug gidiretso og gakus sa biktima una pa kini nananghid nga iyang gakson ang bata. Sa kakurat sa bata milugnot kini ug nagpakiluoy ngadto sa suspek aron siya buhian apan mas gihugtan pa niini ang paggakus ug dayung hawok ngadto niya.
Sa tantong lugnot sa biktima nabuhian kini sa maestro hinungdan nga nakahigayon og dagan sa gawas ang biktima apan aksidenti hinuon kining nadasmag sa pultahan nga gisirad-an hinungdan nga nabun-og ang tuhod niini ug nanglagom.
Nahibaw-an nga ang suspek kauban sa mga tinun-ang lalaki nag-inom nang daan pipila ka oras sa wala pa ang hitabo. Naghilak nga mipauli ang biktima ug pagkabuntag na sa Martes misumbong sa iyang mga ginikanan tungod kay mahadlok na kini nga moeskuwela.
Tungod niini midangop sila sa kapolisan ug gipahiling ang bata ngadto sa tambalanan alang sa eksaminasiyon. (BANATNEWS)
Linkback:
https://tubagbohol.mikeligalig.com/index.php?topic=44070.0
