Ni Brenda D. Batuto/EIM (Banat) Updated May 27, 2012 12:00 AM
CEBU, Philippines - Patay ang usa ka 30-anyos nga lalaki nga nagmaneho sa motorsiklo human siya nabangga sa dakong bato daplin sa karsada kagahapon sa kaadlawon sa sitio Trangka, barangay Lower Becceril, lungsod sa Boljoon.
Ang biktima mao si Julieto Villagonzalo Bucog, taga barangay Poblacion sa maong lungsod nagmaneho sa Honda XRM-110 nga nagtangag sa plakang GB-2226.
Si PO1 Ronnel Paunil sa Boljoon Police Station mibutyag nga sa imbestigasyon nila ni SPO3 Rogelio Fernandez, SPO2 Carlito Amarillo, PO3 Reynaldo Rollon ug PO1 Bienvenido Baloro nga gituohang si Bucog gikan kining mitambong og disko diha sa sitio Sangi, Lower Becceril ug paingon nang mopauli.
Apan pag-abot diha sa lugsongon ug kurbadahong lugar sa sitio Trangka nabangga kini ngadto sa dakung bato hinungdan sa iyang pagkalagpot duha ka dupa gikan sa iyang motor ug nag-una ang ulo pagtugpa sa dalan.
Samtang maayong pagkagusbat sa motorsiklo ni Bucog nga nasangit sa bato kilid sa bung-aw.
Nagtuo ang kapolisan nga kusog ang pagpadagan ni Bucog sa motorsiklo.
Si Bucog daling gidala ngadto sa Oslob District Hospital apan wala na kini kinabuhi nga naabot sa maong tambalanan. (BANAT NEWS)
Linkback:
https://tubagbohol.mikeligalig.com/index.php?topic=50876.0
