Ni Flor V. Querubin
Saturday, August 27, 2011
LOVE triangle ang gituohan nga rason sa pagpusil niadtong lalake nga nagpaabot sa iyang uyab niadtong Huwebes sa gabii sa Barangay Pusok, dakbayan sa Lapu-Lapu.
Tungod sa pagpamusil wa mahinayon ang ilang date.
Samtang suspek sa pagpamusil nasikop sa miaging gabii human sa gihimong follow-up operation sa mga sakop sa Police Station 5 sa Lapu-Lapu City Police Office (LLCPO) nga gipangulohan sa station commander nga si PCInsp. Conrado Manatad.
Ang gunman giila sa kapulisan nga si Rogelito Igot, ulitawo, construction worker nga taga-sityo Matumbo, Barangay Pusok.
Gitug-an ni SP01 Ignacio Mabia sa dihang nahinabi sa Sun.Star Superbalita nga didto na sa iyang gitrabahoan sa dakbayan sa Mandaue gi-pick up si Igot sa mga pulis.
Nasayran nga ang inahan sa suspek mao nay mipahibawo sa mga pulis nga wa diha sa ilang gipuy-an ang iyang anak sanglit mi-report kini sa iyang gitrabahoan sa Mandaue sa dihang gisubay sa kapulisan ang nahimutangan niini.
Apan si Igot nagkanayon nga igo lang siya nga gisugo sa iyang ig-agaw nga gihinganlan og Mark Joseph Patalinjug sa pagpusil kang Nelson Sico, 39 nga taga-sityo Locatha, Barangay Looc, Lapu-Lapu.
Gibulgar sa dinakpan nga si Patalinjug maoy gikarelasyon karon ni Lily, tinuod nga pangalan, gipugngan nga maoy kanhi live-in partner ni Sico.
Asoy pa ni Igot ngadto sa mga imbestigador nga nasayran ni Patalinjug ang gikatakda nga panagkita nila ni Sico ug Lily sa dihang nabasahan niini ang text messages diha sa cellular phone sa maong babaye.
Giunhan sa suspek sa pagpusil si Sico samtang nagpadulong pa si Lily sa ilang meeting place sa Barangay Pusok niadtong Huwebes sa alas 11:45 sa gabii.
Natapsingan ang dunggan sa biktima sa dihang iyang nawakli ang kamot ni Igot nga nagdul-it sa armas diha sa iyang ulo.
Nasuta sa nagpadayon nga imbestigasyon sa Police Station 5 nga buot lang unta nga maningil si Lily sa bayad sa damages gikan ni Sico niadtong sila magkita.
Sa sayo pa, gireklamo ni Lily sa barangay si Sico nga mikulata kaniya sa dihang nagpuyo pa ang duruha ug nisaad ang lalake nga mobayad sa gipangayo nga danyos. --
Gipatik sa mantalaang SuperBalita Cebu Agosto 28, 2011. Linkback:
https://tubagbohol.mikeligalig.com/index.php?topic=43221.0
