DAVAO CITY -- Wa nay kinabuhi nga naglutaw sa dagat ang usa ka security guard kinsa giingong nalumos atol sa ilang pagpangaligo alas 11:00 sa buntag niadtong Lunes didto sa Ernesto Rabel Pinazo sa Bonguyan Beach, Barangay Matina Aplaya, dakbayan sa Davao.
Ang biktima nailhang si Arnie P. Amoy, security guard, ug nagpuyo sa 123 McArthur Highway, Barangay Matina Crossing.
Base sa inisyal nga imbestigasyon sa Talomo Police Station, nasayran nga ang biktima uban sa iyang mga higala nangaligo sa dagat.
Taud-taod wala na nila makita ang biktima maong ila na kining gipahibalo sa kapulisan.
Alas 12:00 sa udto Martes, nakit-an nalang ang biktima sa lapyahan sa Jade Resto Bar duol sa Bonguyan Beach kinsa positibo nga giila sa iyang kauban nga naligo nga si Arlou Bungaos.
Dungang nasayran sa Sun.Star SuperBalita nga di kaayo kabalo molangoy ang biktima kinsa daling gianod sa dagkong mga balod niadtong higayona.
Ang patay nga lawas sa biktima anaa gidala sa Angel Funeral Homes sa dalang Torres ning siyudad kinsa ipailawom sa autopsy. (JPC)
Gipatik sa mantalaang SuperBalita Davao Agosto 27, 2015.
Linkback:
https://tubagbohol.mikeligalig.com/index.php?topic=80826.0
