Ni Flor V. Querubin
Monday, June 20, 2011
PAGKABANGKARUTA sa negosyo maoy hinungdan sa tinguhang paghikog unta sa usa ka Amerikano nga mikatkat sa tower sa Marcelo Fernan Bridge habig sa dakbayan sa Mandaue kagahapon sa hapon.
Nausab ang huna-huna sa langyaw gumikan sa tumang kahadlok samtang siya naglantaw sa ubos sa tower nga adunay gitas-on nga 50 ka mga tiil.
Busa nakombinser sab siya sa mga pulis sa dakbayan sa Mandaue nga gipangulohan ni Supt. James Goforth sa pagkanaog.
Ang langyaw nailhan nga si Jerry (tinuod ngan gipugngan), 50, buwag sa asawa, lumad sa Springville, Alabama USA ug kasamtangan nga nagpuyo sa sityo Datag, Barangay Maribago, Lapu-Lapu City.
Siya dunay hinigugma dinhi apan sa iyang pag-anhi didto na niya mahibaw-i nga usa diay kini ka bayut.
Si PInsp. Wilson Abot, hepe sa Police Station 5 sa Mandaue City Police Office (MCPO) nga duol sa nahitaboan, maoy nangulo sa mga rescuer nga nisaka sa tower diin ilang naabtan si Jerry nga naglingkod ug nanigarilyo sa ibabaw nga bahin.
Si Goforth usab ang didto sa silong naghuwat nga mokanaog ang langyaw.
Nilampos ang mga rescuer sa pagkombinser kang Jerry sa pagkanaog human sa 30 minutos nga negosasyon apan wa gilayon siya makanaog sanglit gipaabot ang aerial ladder sa Bureau of Fire Protection (BFP).
Gamit ang pisi nga gihimong harness sa mga rescuer aron makanaog siya agi sa hagdanan sa taytayan, hinayhinay nga nikanaog ang langyaw.
Nakamugna og alarma sa mga motorista ug kahuot sa trapiko ang gibuhat ni Jerry kay gitapuk-an sa mga pulis ug mga sakop sa mga tigbalita ang ubos nga bahin sa tower sa right side (gikan sa Mandaue side padung sa Lapu-Lapu).
Atol sa gihimong interogasyon sa Investigation Detection and Management Bureau (IDMB) sa MCPO, nasuta nga nabangkaruta sa iyang bar ug billiard hall nga iyang negosyo nga nahimutang sa barangay Basak, Lapu-Lapu ang hinungdan sa iya untang paghikog.
Moabot og P250,000 ang investment sa langyaw sa iyang mga negosyo samtang sud na sa duha ka mga tuig siya nanimuyo sa Sugbo ug adunay kapuyo nga bayut.
Wa nay kuwarta si Jerry ug naproblema sanglit wa na siyay ikabayad sa abangan sa iyang gipuy-an ingon man sa pag-process sa iyang immigration document alang sa iyang visa extension.
Buot nga mopauli na lang sa Amerika si Jerry apan wa siyay ikaplete sa ayroplano hinungdan nga nag-aborido ang iyang ulo ug nagtinguha sa paghikog aron mahuman na ang tanan niyang suliran.
Mga ala 1 kagahapon sa hapon nakabantay na ang mga tiglimpyo sa bridge kalabot sa langyaw.
Si Jerry nibutyag nga naglakaw lang siya gikan sa Lapu-Lapu padung sa Mandaue city dihang nakabantay siyang abli ang kandado sa hagdanan sa tower hinungdan nga nisaka siya.
Nakahurot pa siya og upat ka mga kaha sa sigarilyo dihang nakahukom unta siya sa paglayat apan nangabot ang mga pulis.
Samtang si Goforth, deputy chief for operation, nagkanayon nga hayan kasong “alarm and scandal†ang posible kaso isang-at batok sa langyaw.
Gipatik sa mantalaang SuperBalita Cebu Hunyo 21, 2011. Linkback:
https://tubagbohol.mikeligalig.com/index.php?topic=41817.0
Topic: Langyaw molayat unta sa Mactan bridge (Read 1142 times)